هۆشیار زێباری، كە لەلایەن پارتی دیموكراتی كوردستانەوە كاندیدكراوە بۆ بوون بە سەرۆك كۆمار، لە بەغداد دۆسیەی گەندەڵیی لەسەرە و شەش ساڵ لەمەوبەر متمانەی لێسەندراوەتەوە.
بۆ پۆستی سەرۆك كۆمار، كە پشكی كورد و یەكێتییە و بەرهەم ساڵح سەرۆك كۆماری ئێستای عێراقی بۆ پۆستەكە كاندید كردووە، لەبەرامبەردا پارتی كاندیدێكی بۆ پۆستەكە پێشكەشكرد، سەرەڕای بانگەشەی بەردەوام بۆ یەكڕیزیی هێزە كوردستانییەكان.
هۆشیار زێباری، كە دەكاتە خاڵی مەسعود بارزانی سەرۆكی پارتی، كراوەتە كاندید بۆ بوونە سەرۆك كۆمار، لەكاتێكدا زێباری شەش ساڵ لەمەوبەر و كاتێك وەزیری دارایی بووە، دۆسیەی گەندەڵیی لەسەر بووە و ئەنجومەنی نوێنەرانی ئەوكات متمانەی لێسەندووەتەوە.
گەندەڵی دارایی هۆشیار زێباری
زێباری لە كابینەكەی حەیدەر عەبادی، وەزیری دارایی بوو، دوای تەنها دوو ساڵ لە وەرگرتنی پۆستەكە، ئەنجومەنی نوێنەران لە ڕۆژی 21ی ئەیلوولی 2016 متمانەی لێسەندەوە، دوای ئەوەی دۆسیەی گەندەڵی لەسەر كرایەوە و لە ئەنجومەنی نوێنەران لێپرسینەوەی لێكرا.
یەكێك لەو دۆسێیانەی زێباری لەسەر تۆمەتباركرا بە گەندەڵی، خەرجكردنی یەك ملیۆن و 800 هەزار دۆلار بوو تەنها بۆ بلیتی گەشتی پاسەوانەكانی، كە لە هەولێر نیشتەجێ بوون.
ئەمە جگە لەوەی بە نرخێكی زۆر (188 ملیۆن دیناری مانگانە) ماڵێكی بەكرێ گرتبوو، هەروەها پارەیەكی زۆری بۆ كەرەستە و كەلوپەلەكانی ناوماڵەكەی خۆی لە بەغداد تەرخاندەكرد، بەتایبەت بۆ مەلەوانگەی ناو ماڵەكەی، كە مانگانە سێ ملیۆن و 500 هەزار دینار بۆ خاوێنكردنەوەی تەرخانكرابوو.
زێباری دوو ماڵیشی بۆ بەڕێوەبەری نووسینگەكەی و خانمە سكرتێرەكەی بەكرێ گرتبوو بە نرخێكی زۆر، (نزیكەی 100 ملیۆن دیناری ساڵانە)، لە كاتێكدا بەپێی ڕێنماییەكان نابێت هیچ بەرپرسێكی حكومی ساڵانە لە 36 ملیۆن دینار زیاتری بۆ كرێ خانوو بۆ خەرجبكرێت.
عەبادی ئەوكات بڕیاریدابوو پاسەوانی وەزیرەكانی كابینەكەی بۆ تەنها هەشت كەمبكاتەوە، بەڵام زێباری زیاتر لە 500 پاسەوانی هەبووە لە بەغداد و هەولێر، خەرجی كاروانی ئۆتۆمبێلەكانی سەدان ملیۆن دینار بوون، هەروەها مووچەی پاسەوانەكانی، لە ساڵێكدا نزیكەی 20 ملیار دینار بووە، لەكاتێكدا دیارنییە تەواوی پاسەوانەكان بوونیان هەبووە، یان وەهمی بوون.
هەر ئەوكات نەسریەی مانگانەی نووسینگەكەی نزیكەی 50 ملیۆن دینار بووە، لەكاتی وەزیر بوونیدا مانگانە تەواوی پارەكە ڕاكێشراوە، بێ ئەوەی دیاربێت چۆن خەرجكراوە، بەپێی میدیا عێراقییەكان.
هۆشیار زێباری ئەوكات لەبری ئەوەی بەرگری لە خۆی بكات و بیسەلمێنێت گەندەڵیی نەكردووە، بەرپرسانی دیكەی بە گەندەڵی تۆمەتبار كرد، بێ ئەوەی ناوی كەس ئاشكرابكات.
ئەنجومەنی نوێنەران و لیژنەی دەستپاكیی ئەوكاتی ئەنجومەنەكە، دۆسیەكانی گەندەڵیی هۆشیار زێباری-یان نارد بۆ دەستەی دەستپاكی و تائێستا دۆسیەكان لە دەستەكەن، بڕیاریش بوو بنێردرێن بۆ دادگا، بەڵام نەنێردراون.
ئەوكات كە هۆشیار زێباری لەسەر گەندەڵی متمانەی لێسەندرایەوە، ترس دروستبوو كاریگەریی هەبێت لەسەر پەیوەندیی سندوقی دراوی نێودەوڵەتی و وڵاتانی كۆمەكبەخش لەگەڵ عێراق، بەوەی متمانەیان بە وڵاتەكە نەمێنێت لە پێدانی یارمەتی و كۆمەكە داراییەكان.
دانانی بەعسی لە باڵیۆزخانەكانی عێراق
لە مانگی شوباتی 2018، دووبارە لیژنەی دەستپاكیی ئەنجومەنی نوێنەران دۆسیەی هۆشیار زێباری هێنایەوە بەرباس، ئەوكات بەوە تۆمەتباركرا، كە كاتێك وەزیری دەرەوە بووە لە كابینەكەی نوری مالكیدا، خەڵكانێكی بەعسیی لە باڵیۆزخانەكانی عێراق لە وڵاتان داناوە.
جگە لەوە، لیژنەی دەستپاكی لە نووسراوێكیدا، هۆشیار زێباری بەوە تۆمەتباركرد، كە هاوسەرگیریی لەگەڵ كەسێك كردووە بەناوی “هناء عبدالستار الدليمي”، دوای ئەوەی خولێكی وەزارەتی دەرەوەی تەواوكردووە، ڕاستەوخۆ براوەتە یەكێك لە باڵیۆزخانەكانی عێراق لە ئەوروپا، ئەمە جگە لەوەی زێباری چوار خوشكی خۆشی لە باڵیۆزخانەكانی عێراق لە ئەوروپا دامەزراندووە.
ئەوەی جێی سەرسوڕمانە، باوكی “هناء”ی هاوژینی زێباری، لە دوای پرۆسەی ئازادیی عێراق لە ساڵی 2003، ناوی لە لیستی ئەو 200 كەسەدا بوو كە لەلایەن ئەمریكا و پۆڵ بریمەر حاكمی مەدەنیی ئەوكاتی عێراقەوە داواكراو بوون.
