کۆمپانیای مێتای خاوەنی تۆڕی کۆمەڵایەتیی فەیسبووک ئاشکرایکرد، سەرقاڵی دروستکردنی کۆمپیوتەرێکن، کە خێراییەکی پێوانەیی هەیە و پێشبینی دەکەن لە ساڵی داهاتوودا کارەکانی تەواو ببێت.
کۆمپانیاکە جەختدەکاتەوە لەوەی کۆمپیوتەرەکە ئەو کۆمپانیایانە لێی سوودمەند دەبن، کە لەبواری زیرەکیی دەستکرددا کاردەکەن، دەتوانن لەڕێگەی ملیاران نموونەوە بیرۆکەکانیان بوونیادبنێن، لەگەڵ مامەڵەکردن لەگەڵ سەدان زمانی جیاواز و شیکردنەوەی دەق و وێنە و ڤیدیۆ.
بەوتەی مێتا، “خزمەتگوزارییەکە تەنها بۆ یارمەتیدانی ئەو کەسانە نییە کە ئێستا لە چوارچێوەی خزمەتگوزارییەکانماندان، بەڵکو سەرجەم ئەوانە دەگرێتەوە کە لە داهاتوویەکی نزیکدا دەچنە ناو خزمەتگوزاریی مێتاڤێرسەوە (جیهانی گریمانەیی)، کە خزمەتگوزارییەکی نوێی مێتایە و ئێستا لە ئامادەکاریدایە”.
