پۆلیسی سلێمانی ڕایگەیاند، سێ کەسیان دەستگیرکردووە، کە نوشتە و جادوویان بۆ خەڵک کردووە بە 600 دۆلار.
پۆلیسی سلێمانی ئاشکرایکردووە، “دواى ئه‌وه‌ى هاوڵاتییه‌ك سكاڵاى له بنكه‌ى پۆلیسى چوارچرا تۆماركرد له دژى سێ تۆمه‌تبار، كه له‌ڕێگه‌ى نوشته و فاڵگرتنەوەوە فێڵى لێكراوه و بڕى 600 دۆلاریان لێسه‌ندووه، ده‌ستبه‌جێ مه‌فره‌زه‌كانى بنكه‌ى پۆلیسى چوارچرا لێكۆڵینه‌وه‌كانى ده‌ستپێكرد و دواى وه‌رگرتنى بڕیارى دادوه‌ر، توانرا هه‌رسێ تۆمه‌تبار ده‌ستگیربكرێن، که فێڵیان له هاوڵاتییان كردووه و له‌ڕێگه‌ى په‌یجێكه‌وه له تۆڕى كۆمه‌ڵایه‌تیى فه‌یسبووك هاوڵاتییانیان فریوداوه”.
لەبارەی ڕەگەز و تەمەنی ئەو کەسانەوە، پۆلیس ئاشكرایكردووە، سێ گەنج بوون لە ڕەگەزی نێر و لە ڕیگای پەیجێکەوە خەڵکیان ڕاکێشاوە.
پێشتر ناوەندی میدیای دیجیتاڵیی “DMC” ڕایگەیاند، لە هەردوو تۆڕی كۆمەڵایەتیی فەیسبووك و ئینستگرام دەیان ڕیكلامی بەدیكردووە كە بەشێكیان ڤیدیۆی “نا ئەقڵانی”ی كەسانێكن بانگەشەی ئەوە دەكەن كە “پزیشك، پیاوی ئایینی، كەسی ڕۆحانی یاخود چارەسازن و كارەكانیان سنوورەكانی زانست و ژیری و تەنانەت ئایین تێدەپەڕێنن”.
ناوەندەكە باس لەوە دەكات كە زۆرینەی ئەو چالاكییانە لە فەیسبووك دەكرێن و كەمتریان لە ئینستگرامن، بۆیە سەرسوڕمانی خۆی نیشاندەدات لەوەی چۆن كۆمپانیای فەیسبووك ڕێگە بەو جۆرە چالاكییانە دەدات و دەڵێت، “چۆن ڕێگە بە ڕیكلامكردن بۆ ئەو لاپەڕانە دەدرێت لەكاتێكدا پێچەوانەی پێوەرەكانی فەیسبووكن و فێڵ لە خەڵك دەكەن”.
ناوەندی “DMC” پێیوایە فەیسبووك دژی یاساكانی خۆی كاردەكات و دژیەكی لە بڕیارەكانیدا هەیە، بۆیە داوا لە كارگێڕیی فەیسبووك دەكات شەفافانە كاربكات و سنوورێك بۆ ئەو جۆرە چالاكی و ڕیكلامانە دابنێت و پشكنینی ورد بۆ ناوەڕۆكی بابەتەكانی سەر تۆڕەكە بكات.
