هەسەدە، “بەهۆی مامەڵەی خراپی چەند شەڕڤانێك لەگەڵ چەكدارانی داعش”، ژمارەیەك شەڕڤان دەردەكات و ڕەوانەی دادگا كراون، بەهۆی ئەوەی بەها و پرەنسیپە ئەخلاقی و سەربازییەكانی هەسەدەیان پێشێلكردووە.
دوێنێ چەند گرتەیەكی ڤیدیۆیی لە تۆڕە كۆمەڵایەتییەكان بڵاوكرانەوە، ژمارەیەك لەو چەكدارانەی داعش كە هێرشیان كردبووە سەر زیندانی غوێران، لەلایەن چەند ئەندامێكی هەسەدەوە دەستگیركراون و جلوبەرگی سەرەوەیان پێداكەندراوە.
لەبارەی گرتە ڤیدیۆییەكانەوە هێزەکانی سوریای دیموکرات ڕوونكردنەوەیەكی بڵاوكردووەتەوە و گرتە ڤیدیۆییەكانی بە “وێنەی ناشرین” وەسفكردووە، دەڵێت، ئەو شەڕڤانانەی لە ڤیدیۆكاندا دەردەكەون ، لە ڕیزەكانی هەسەدە دەركراون و ڕەوانەی دادگای تایبەتمەند دەكرێن، بەو پێیەی “بەها و پرەنسیپە ئەخلاقی و سەربازییەکانی هێزەکانی سوریای دیموکراتیان پێشێلکردووە”.
لە پێنجشەممەی ڕابردووەوە لە حەسەكەی ڕۆژئاوای كوردستان شەڕ لەنێوان هێزەكانی سوریای دیموكرات و چەكدارانی داعش سەریهەڵداوە، دوای ئەوەی پیلانێكی داعش شكستیپێهێنرا بۆ هەڵاتنی چەكدارەكانی لە زیندانی غوێرانی حەسەكە، نزیكەی 300 چەكداری داعش دەستگیركراونەتەوە و سەدانیشیان لێكوژراون.
