بەشی ڕاگەیاندنی دەروازەی نێودەوڵەتیی حاجی ئۆمەران ڕایگەیاند، بەهۆی بەفربارینی زۆرەوە، سەرەڕای هەوڵی تیمەکان بۆ پاكکردنەوەی ڕێگاكان، بەڵام بەفربارین ڕێگای گەشتکردنی بۆ ئێران و بە پێچەوانەشەوە سەختکردووە.
لە ڕاگەیەندراوێکی دەروازەی حاجی ئۆمەراندا، کە وێنەیەکی بۆ تۆڕی میدیایی ئێستا نێردراوە، هاتووە، “ئاگاداری هەموو گەشتیاران و هاووڵاتیانی خۆشەویست دەکەین، بەهۆی بارینی بەفرێکی زۆر و سەختیی ڕێگاکان و کەمبوونی ئاستی بینین، هاوڵاتییان ئەگەر کارێکی پێویستیان نەبێت سەردانی دەروازەکە نەکەن”.
ئاماژە بەوەشکراوە، “بەهۆی بارینی بەفرێکی زۆر و کڕێوە و خراپی کەشوهەوا، سەرەڕای خاوێنکردنەوەی شەقام و ڕێگا سەرەکییەکان و گۆڕەپان و شەقامەکان بە بەردەوامی لەلایەن تیمەکانی بەفرڕاماڵینی بەڕێوەبەرایەتیی چاککردنی ڕێگاوبان و تیمەکانی بەشی خزمەتگوزاریی دەروازەکەمان، هەروەها بارینی بەفرێکی زۆر لەناو ڕێگاکانی ناو سنووری ئێراندا ، داوا دەکەین ئەگەر بۆ کارێکی زۆر پێویست، نەبێت جارێكە سەردانی دەروازەی نێودەوڵەتیی حاجی ئۆمەران نەکرێت”.
هەروەها دەروازەكە ڕاشیگەیاندووە، “ئاگاداری گەشتیاران دەکەینەوە كە بەمەبەستی گەشتکردن بۆ وڵاتی ئێران یان بە پێچەوانەوە دێنە سنوورەکە، هەروەها ئەو هاووڵاتییانەی ئێران کە دەیانەوێت سەردانی هەرێمی کوردستان بکەن، تا بارودۆخەکە بە باشی ئاسایی دەبێتەوە سەردانی خاڵە سنوورییەکە نەکەن”.
