دەستنیشانکردنی پێشوەختەی تووشبوون بە نەخۆشیی شێرپەنجە یەکێکە لە کارە سەختەکان، لەگەڵ ئەوەشدا هۆكارێكە بۆئەوەی تەنانەت کەسی تووشبوو ماوەیەکی زیاتر بژی بەراورد بەوەی خەڵک ترسی لێی هەیە.
شێرپەنجە نەخۆشییەکی نوێ نییە، بەپێی کۆمەڵەی شێرپەنجەی ئەمریکی، نەخۆشییەکە یەکێکە لەخراپترین ئەو نەهامەتییانەی تووشی مرۆڤ بووە لە مێژوودا.
بەشێکی زۆر لە پسپۆڕانی بوارەکە جەختدەکەنەوە لەوەی شێوازی ژیانی کەسەکان هۆکارێکە بۆ تووشبوون بە شێرپەنجە.
لەگەڵ ئەوەی ڕێگای زانستی و ئامرازی تایبەت بە دەستنیشانکردنی نەخۆشیی شێرپەنجە زۆرن، بەڵام توانای پێشوەختە دەستنیشانکردنیان نییە، پسپۆڕان باس لە پێنج ڕێگا دەکەن بۆئەوەی پێشوەختە، یان لانیکەم لەماوە سەرەتاییەکانی تووشبوونیان، نەخۆشییەکە دەستنیشان بکرێت.
یەکەم، کەمبوونەوەی کێش بەبێ هۆکارێکی دیاریکراو: لەدەستدانی کێشی لەش لەوکەسانەی تووشی شێرپەنجە دەبن لەسەرەتاوە یەکێکە لە نیشانە هاوبەشەکان، زیاتر 40%ی ئەوانەی لە ئەمریکا تووشی شێرپەنجە بوون، ئاماژە بەوەدەکەن پێشوەخت بەشێکی زۆری کێشیان لەدەستداوە بەبێ هۆکار.
دووەم، ماندوێتیی توند: ماندوێتی دوای ڕۆژێکی پڕ لە کار بابەتێکی ئاساییە، بەڵام لەدوای پشوودان و بەردەوامیی ئەو ماندوێتییە نیشانەیەکی گرنگی تووشبوونە بە نەخۆشیی شێرپەنجە.
سێیەم، تا: بەرزبوونەوەی پلەی گەرمیی لەش دەکرێت بەهۆی سەرما و ئەنفلوەنزاوە بێت، بەڵام وەک نیشانەیەکی شێرپەنجە جیاوازە بەوەی بە بەردەوامی دووبارە دەبێتەوە بەبێ ئەوەی هیچ هۆکارێکی هەبێت.
چوارەم، ئازاری بەردەوام، هەندێک لە گرێ شێرپەنجەییەکانی مێشک دەکرێت هۆکاری ئازاری بەردەوام بێت کە پزیشکەکان نەتوانن هۆکارەکەی ئاشکرابکەن، لەکاتی تووشبوون بەو جۆرە سەرئێشە بەردەوامە بێهۆکارانە پێویستە ڕاوێژ بە پزیشکی تایبەتمەند بکرێت.
پێنجەم، گۆڕانکاری لە پێستدا: هەر گۆڕانکارییەکی نامۆ و لەپڕ لە پێست یان دەوروبەری چاو یاخود پێستی ئانیشکەکان دەکرێت نیشانەی پێشوەختی شێرپەنجە بن.
