دانیشتنەكەی دوێنێی ئەنجومەنی نوێنەران ناكۆكییەكانی نێوان هەردوو بەرەی شیعەكانی زیاتركرد و سەركردەیەكی چێوەی هەماهەنگیش دەڵێت، لەوكاتەوە هیچ وتووێژێكیان لەگەڵ ڕەوتی سەدردا نییە.
عائد هیلالی، سەركردە لە چێوەی هەماهەنگی، كۆكەرەوەی هێزە شیعییەكانی دەرەوەی ڕەوتی سەدر، ڕایگەیاند، لە ساتەوەختی دانیشتنەكەی دوێنێی ئەنجومەنی نوێنەرانی عێراقەوە تائێستا هیچ گفتوگۆ یان پەیوەندییەك لەنێوان هێزەكانی چێوەی هەماهەنگی و ڕەوتی سەدر لەئارادانییە، گفتوگۆكان بەتەواوی پەكیان كەوتووە.
سایتی بەغداد لیەوم لە زاری هیلالی وتیشی، “لە ڕۆژانی كەمی داهاتوودا ڕەنگە سەرلەنوێ گفتوگۆكان لەنێوان هەردوولا دەستپێبكەنەوە”.
هەندێك لە سەركردەكانی چێوە لەلایەن ڕەوتی سەدرەوە قبوڵكراون، دەشێت ئەوە ببێتە سەرچاوەی سەرلەنوێ دروستكردنی پەیوەندی لەنێوان هەردوولا، وەك ئەوەی سەركردەكەی چێوەی هەماهەنگی وتی و دوپاتیشیكردەوە، بەڵام تا ئەم ساتە هیچ دەستپێشخەرییەك یان جوڵەیەك بەو ئاراستەیە لەئارادانییە.
دوێنێ یەكەم دانیشتنی خولی پێنجەمی ئەنجومەنی نوێنەرانی عێراق ئەنجامدرا و تیایدا دوای سوێندخواردنی پەرلەمانتاران، سەرەڕای ناڕەزایەتی و بایكۆتی دانیشتنەكە لەلایەن پەرلەمانتارانی چێوەی هەماهەنگی و جێهێشتنی لەلایەن پەرلەمانتارانی یەكێتی، هەڵبژاردن بۆ دەستەی سەرۆكایەتیی ئەنجومەنی نوێنەران ئەنجامدرا.
لەدوای ئەنجامدانی هەڵبژاردنەكەی تشرینی یەكەمی ڕابردووەوە موقتەدا سەدر، سەرۆكی ڕەوتی سەدر جەخت لەسەر پێكهێنانی حكومەتی زۆرینەی نیشتمانی دەكاتەوە و هەڵبژاردنەكەی دوێنێی دەستەی سەرۆكایەتیی ئەنجومەنی نوێنەران بەو ئاراستەیە بوو، لە بەرامبەردا چێوەی هەماهەنگی جەختی لەسەر پێكهێنانی حكومەت هاوشێوەی ساڵانی ڕابردوو بە سازان دەكردەوە.
