ئەنجومەنی نوێنەرانی عێراق دەرگای خۆپاڵاوتنی بۆ پۆستی سەرۆك كۆمار كردەوە و مەرجەكانیشی دیاریكردووە.
خۆپاڵاوتن بەپێی ماددەكانی (2 و 3)ی یاسای ژمارە (8)ی ساڵی 2012 (یاسای ئەحكامی خۆپاڵاوتن بۆ پۆستی سەرۆك كۆمار) دەبێت، ئەنجومەنی نوێنەران داواش لە خوازیاران، ئەوانەی مەرجە دیاریكراوەكانیان تێدایە، داواكاریی نووسراو پشتبەست بە بەڵگەنامە فەرمییەكان كە بوونی مەرجەكان بسەلمێنێت، لەگەڵ كورتەی ژیانیان پێشكەش بە ئەنجومەنی نوێنەران بكەن.
هەروەك ڕۆژانی سێشەممە، چوارشەممە و پێنجشەممە بۆ پێشكەشكردنی داواكارییەكان دیاریكراوە.
لە نووسراوەكەیدا ئەنجومەنی نوێنەران مەرجەكانیشی دیاریكردووە كە بریتین لە، (عێراقی بێت لە دایك و باوكی عێراقی، بەتوانابێت و تەمەنی 40 ساڵی تەواوكردبێت، ناوبانگی باش و شارەزایی سیاسی هەبێت، دەستپاك و دادپەروەر و دڵسۆزیی نیشتمان بێت، بڕوانامەی لە بەكالۆریۆس كەمتر نەبێت، سزانەدرابێت بە تاوانی بەدڕەوشتی و لەو كەسانە نەبێت كە ئەحكامی یاسای لێپرسینەوە و دادپەروەری دەیگرێتەوە).
سەرۆكایەتیی ئەنجومەنی نوێنەران دووپاتیشیكردووەتەوە ئەوپەڕی وادەی هەڵبژاردنی سەرۆك كۆمار لە كۆتایی ڕۆژی 8ی شوباتی داهاتوو دەبێت بەپێی ماددەی (72/دووەم/ب)ی دەستوور.
پۆستی سەرۆك كۆمار كە پشكی كوردە و بەدرێژایی ساڵانی ڕابردوو لەلایەن كاندیدی كورد و لەكوردیشدا لەلایەن یەكێتیی نیشتمانیی كوردستانەوە پڕكراوەتەوە، بۆ ئەم خولەش لەلایەن یەكێتی-یەوە بەرهەم ئەحمەد ساڵح دووبارە كاندید كراوەتەوە.
لەكاتێكی پێشتری ئەمڕۆ هۆشیار زێباری، ئه‌ندامی مه‌كته‌بی سیاسیی پارتی دیموكراتی كوردستان، كه هاوكات سه‌رۆكى شاندى ئه‌و حزبه‌یه له به‌غداد بۆ دانوستاندنه‌كانى پێكهێنانى حكومه‌ت، له لێدوانێكى ڕۆژنامه‌وانیدا ده‌رباره‌ى بوونی كاندیدی پارتی بۆ پۆستی سه‌رۆك كۆمار، جه‌ختى له‌وه كردووه‌ته‌وه، “نه‌خێر كاندیدمان نابێت و بۆ ئه‌و بابەتەش له‌گه‌ڵ لایه‌نه‌كان قسه‌ده‌كه‌ین”.
بەمەش بەرهەم ساڵح دەبێتە كاندیدی كورد بۆ وەرگرتنی ئەو پۆستە و هەڵبژاردن و یەكلاكردنەوەی تەنها دانیشتنی داهاتووی ئەنجومەنی نوێنەرانی ماوە.
پێشتر مەهدی كەریم، پەرلەمانتاری پارتی لە ئەنجومەنی نوێنەرانی عێراق بە ئاژانسی هەواڵی عێراقی (واع)ی ڕاگەیاند، پارتی و یەكێتی ڕێككەوتوون لەسەر پرسی سەرۆك كۆمار، بەشێوەیەك، یەكێتی دوو كاندید پێشكەشدەكات بۆ پۆستەكە.
بەوتەی پەرلەمانتارەكەی پارتی، پرسی دوو كاندیدییەكە، لای كورد و ڕەوتی سەدر و هاوپەیمانیی تەقەدومی حەلبووسی یەكلابووەتەوە.
بەڵام هەرێم كەمال ئاغا، پەرلەمانتاری یەكێتی لە لێدوانێكیدا بۆ تۆڕی میدیایی ئێستا قسەكانی پەرلەمانتارەكەی پارتیی ڕەتكردەوە بەوەی یەكێتی دوو كاندیدی هەبێت.
هەرێم كەمال ئاغا دووپاتیكردەوە، یەكێتی تەنها یەك كاندیدی هەیە، ئەویش دكتۆر بەرهەم ساڵحە.
