وەزیری پەروەردەی حکومەتی هەرێمی کوردستان ئاشکرایکرد، تا ئێستا 91 هەزار فەرمانبەر و مامۆستا لە وەزارەتی پەروەردە خۆیان ڤاکسین کردووە.
ئالان حەمە سەعید، وەزیری پەروەردەی هەرێم لە کۆنگرەیەکی ڕۆژنامەوانیدا ڕایگەیاند، ”ئێمە چاودێریی خۆڤاکسینکردنی فەرمانبەرانی پەروەردە دەکەین، بەڵام داتامان لەبەردەست نییە کە چەند خوێندکار خۆی ڤاکسین کردووە، بەڵام دڵنیاین ڕێژەكە کەمە”.
بە وتەی وەزیری پەروەردەی هەرێم، وەک لیژنەی ڕووبەڕووبوونەوەی ڤایرۆسی کۆرۆنا لە هەرێم بڕیاریداوە، پێویستە تا 20ی ئەم مانگە، هەموو فەرمانبەرێکی هەرێم خۆی ڤاکسین کردبێت، ئەگەر فەرمانبەرانی پەروەردەش تا ئەو کاتە خۆیان ڤاکسین نەکردبێت، ئەوا ڕێکاری نوێ لەسەر ئەو پرسە دەردەکرێت”.
لە هەرێمی کوردستان شەش هەزار و 749 خوێندنگای حکومی هەن، بەپێی ڕێنمایی وەزارەتی پەروەردە، هەموو خوێندکار و مامۆستایەک بە ناچاری لە خوێندنگاکاندا دەبێت ماسک ببەستێت.
حکومەتی هەرێم پێشتر بڕیاریدابوو، هەر فەرمانبەرێک تا ڕۆژی یەکی کانوونی دووەمی ئەمساڵ خۆی ڤاکسین نەکات، ڕێگای نادرێت بچێتەسەر کارەکەی، بەڵام دوای ئەوە ماوەكە بۆ 20 ڕۆژ درێژکرایەوە.
