دوای چوونە بەردەم دادگای سنە و تەواوكردنی ڕێوشوێنە یاساییەكان، بڕیارە كاتژمێرێكی دیكە زارا موحەمەدی بەرەو زیندان بگوازرێتەوە بەمەبەستی جێبەجێكردنی سزاكەی، وەك ئەوەی ئەندامێكی ئەنجومەنی فەرهەنگی كۆمەڵایەتیی نۆژین دەیڵێت.
ئەمڕۆ زارا موحەمەدی، بەرپرسی گشتیی ئەنجومەنی فەرهەنگی كۆمەڵایەتیی نۆژین چووە بەردەم دادگای سنە، پاش ئەوەی لەلایەن دادگاوە بڕیای پێنج ساڵ زیندانیی بەسەردا سەپێنرا.
ئەندامێكی ئەنجومەنەكە، كە نەیویست ناوی ئاشكرابكرێت، بە تۆڕی میدیایی ئێستای ڕاگەیاند، “ئێستا لەبەردەم دادگاین بۆ دواماڵئاوایی، بڕیارە كاتژمێرێكی دیكە بەرەو بەندینخانەی ناوەندیی سنە بگوازرێتەوە”.
وتیشی، “لەئێستادا سەرقاڵی جێبەجێكردنی كارە ئیدارییەكانە و دواتر بۆ جێبەجێكردنی سزاكە دەگوازرێتەوە بۆ زیندان”.
پێشتر ئەنجومەنی فەرمانگی كۆمەڵایەتیی نۆژین، لە ڕاگەیەندراوێكدا ئاشكرایكرد، پاش ئەوەی سەرجەم ڕێچكە یاساییەكانیان لە قۆناغەكانی دادگای سەرەتایی و دادگای پێداچوونەوە و دیوانی باڵا گرتووەتەبەر بەمەبەستی هەڵوەشاندنەوەی سزاكە، بەڵام سەرنجام سزاكە لەلایەن بەرپرسی گشتی دەزگای دادی پارێزگای سنەوە بە پێنج ساڵ زیندانی سەپێنرا.
ئەندامی ئەنجومەنەكە وتیشی، تانەدانەكەیان بە بەكارهێنانی ماددەی 477 لەلایەن بەرپرسی گشتیی دەزگای دادوەریی پارێزگای سنە ڕەتكراوەتەوە و سزاكەی دووپاتكرایەوە.
زارا موحەمەدی، مامۆستای زمانی كوردی لەمانگی ئایاری 2019 دوای هێرشی هێزەکانی ئیدارەی ئیتلاعاتی ئێران بۆ سەر ماڵەکەی لە شاری سنە دەستبەسەر و دواتر بە دانانی بارمتەی 700 ملیۆن تمەن بەشێوەی کاتی ئازادکرا.
موحەمەدی لە مانگی تەمموزی 2020 لەلایەن لقی یەکەمی دادگای شۆڕشی سنەوە، بە تۆمەتی پێکهێنانی گروپ لە دژی ئاسایشی نەتەوەیی ئێران، سزای 10 ساڵ بەندکرانی بەسەردا سەپێنرا.
ئەوەش لەكاتێكدایە زارا موحەمەدی تەنیا ئەندامی ئەنجومەنی نۆژین بووە و دادگا ئەو ئەنجومەنەی لە هەموو تۆمەتەکان بە بێتاوان ناساندووە.
دوای دروستبوونی ناڕەزایەتییەكی زۆر لەبارەی حكومەكەی، لەمانگی شوباتی ساڵی ڕابردوو، دادگای پێداچوونەوەی سنە سزاكەی بۆ پێنج ساڵ کەمکردەوە.
زارا تەمەن 30 ساڵ و لەدایکبووی گوندی سەراوڵەی شاری دێولان سەر بە پارێزگای سنەیە و بڕوانامەی کارناسیی باڵای جیۆپۆلەتیكی لە زانکۆی “بیرجەند” وەرگرتووە.
ئەو چالاکە مەدەنییە ماوەی زیاتر لە 10 ساڵە کە لە گوندەکانی دەوروبەری سنە و ناو شاری سنە وانەی کوردی دەڵێتەوە.
حەوت ساڵ لەمەوبەر، زارا، یەکێک لە دامەزرێنەرانی ڕێکخراوی فەرهەنگی کۆمەڵایەتی نۆژین بوو و دواتر بەکۆی دەنگی ئەندامانی ئەنجومەنی ڕێكخراوەكە وەکو بەرپرسی گشتیی ڕێکخراو هەڵبژێردرا.
ئەنجومەنی نۆژین یەکێک لە ئەنجومەنە فەرهەنگی و کۆمەڵایەتییەکانی پارێزگای سنەیە، کە لە چەندین شار و ناوچەی ئەو پارێزگایە وەک سنە، کامیاران، دێولان، سەقز و بانە لقی هەیە و چالاکی دەکات.
