پێگەی جیهانیی گوگڵ ئەمڕۆ شەممە 8ی کانونی دووەم یادی لەدایکبوونی زانای فیزیایی ستیڤن هاوکینگ دەکاتەوە، کە لە 8ی کانونی دووەمی ساڵی 1942 لەدایکبووە.
پێگەی گوگڵ وەک یادکردنەوەی ئەو زانا فیزیاییە، ڤیدیۆیەکی بڵاوکردووەتەوە، ژیانی زاناكە و هەروەها تیۆریی کونە ڕەشەکان “The black hole theory”ی تێدا نمایشكراوە، کە هاوکینگ خاوەندارێتیی دەکات.
ستیڤن ئیدوارد هاوکینگ لە 8ی کانونی دووەمی 1942 لە ئۆکسفۆرد لەدایکبووە، باوکی پسپۆڕی زیندەزانی بووە، بەهۆی جەنگەوە ڕۆیشتووەتە لەندەن لەسەردەمی جەنگی جیهانیی دووەمدا.
هاوکینگ لە بەناوبانگترین زانایانی فیزیایی و گەردوونزانییە لەجیهاندا، لەزانکۆی ئۆکسفۆرد خوێندکاربووە و گەیشتووەتە پلەی یەکەم لەبواری فیزیا.
لە زانکۆی کامبریج بەردەوامبووە لەخوێندن تاوەکو دکتۆرای بەدەستهێناوە لە گەردوونزانیدا، لەوێوە بەردەوامبووە لە توێژینەوەکانی لەبارەی تیۆرییەکانی گەردوونزانی، لەوانە، کونە ڕەشەکان و توێژینەوەکانی لەبارەی تێپەڕاندنی کات و بووبەخاوەنی تیۆریی ڕێژەیی و کوانتی، هەروەها پەیوەندیی نێوان کونەڕەشەکان و ئاڵوگۆڕەکانی گەرمی.
هاوکینگ تووشبووی نەخۆشیی (motor neuron disease) بووە، کە ڕۆژبەڕۆژ توانای کارکردنی ئەندامەکانی جەستەی لاوازبوون، تاوەکو لەکۆتاییدا جگە لە سەری، هیچ ئەندامێکی دیکەی جەستەی کاریان نەکردووە، بیرۆکەکانیشی لەڕێگەی ئامێری وەرگێڕانی بیرکردنەوە بۆ قسەکردن و نووسین خراونەتەڕوو.
هاوکینگ لەبارەی دروستبوونی گەردوون و خوداوە بیرۆکەی جیاوازی هەبووە، لە بەناوبانگترین کتێبەکانی هاوکینگ کە تائێستا نازانرێت چەند کەس لەجیهاندا توانیویەتی سەرجەم کتێبەکانی بخوێنێتەوە، کتێبی مێژووى كات – له ته‌قینه‌وه‌ى گه‌وره به‌ره‌و كونه ڕه‌شه‌كان (From the big bang to black – a brief history of time holes)ــە، کە بۆ زیاتر لە 40 زمانی جیهان وەرگێڕدراوە.
