وەزارەتی نەوتی عێراق داهاتی فرۆشتنی نەوتی مانگی کانوونی یەکەمی بڵاوکردەوە و ڕایگەیاند، داهاتی نەوتی مانگی ڕابردوو زیاتر بووە لە حەوت ملیار دۆلار، زیاتر لە 100 ملیۆن بەرمیل نەوتیش هەناردەکراوە.
وەزارەتی نەوتی عێراق ڕایگەیاندووە، بەپێی ئاماری کۆمپانیای سۆمۆی نیشتمانی، کۆی هەناردەکردنی نەوت لە مانگی کانوونی یەکەمدا 101 ملیۆن و 579 هەزار و 927 بەرمیل بووە.
بڕی داهاتی فرۆشتنی نەوت لەهەمان مانگدا حەوت ملیار و 37 ملیۆن دۆلار بووە.
بەپێی ڕاگەیەندراوەکەی وەزارەتی نەوت، کۆی نەوتی هەناردەکراو لە کێڵگە نەوتییەکانی ناوەڕاست و باشووری عێراق 98 ملیۆن و 570 هەزار و 290 بەرمیل نەوت بووە.
هەروەها بڕی ملیۆنێک و 700 هەزار و 95 بەرمیل نەوت لە کێڵگەکانی کەرکوکەوە هەناردەکراوە.
بەپێی ئامارەکە، تێکڕای هەناردەی ڕۆژانەی نەوتی عێراق 3.277 ملیۆن بەرمیل بووە، تێکڕای نرخی بەرمیلێک نەوتیش 72 دۆلار بووە.
