ژووری حکومەتی بزوتنەوەی گۆڕان ڕوونکردنەوەیەکی لەبارەی بڕیاری کشانەوە یان مانەوەی تیمەکانیان لە حکومەتی هەرێم بڵاوکردەوە، ڕایگەیاند، تیمەکانیان تا دوا بڕیاری سیاسی بۆ مانەوە لە حکومەتدا یان کشانەوە، لە حکومەتدا نوێنەرایەتیی گۆڕان دەکەن.
ژووری حکومەتی بزوتنەوەی گۆڕان سەبارەت بە ئەنجامی هەڵبژاردنەکانی عێراق ڕایگەیاندووە، لەدوای هەڵبژاردنی پەرلەمانی عێراق لە 10/10/2021 و دەرکەوتنی ئەنجامە سەرەتاییەکان، بەمەبەست و بێمەبەست ڕووی قسە و ڕەخنەکان لە سەرکردایەتیی بزوتنەوەکە (خانە و جڤاتەکان) و تیمەکانی حکومەت (هەرێم، خۆجێیی) بووە.
بەپێی ڕوونکردنەوەکە، بەوهۆیەوە ئەندامانی خانە و ڕێکخەری گشتیی بزوتنەوەکە دەستیانلەکارکێشایەوە، بۆ ئەو مەبەستەش بزوتنەوەی گۆڕان لە هەوڵی دیاریکردن و هەڵبژاردنی دەستەیەکی کاتیدایە بۆ سەرکردایەتیکردنی بزوتنەوەکە.
سەبارەت بە بڕیاری بزوتنەوەکە لەبارەی كشانەوە یان مانەوە لە حکومەت، دەڵێت، “جەخت لەوە دەکەینەوە تا ئەو کاتەی بزوتنەوەی گۆڕان دەگاتە دوا بڕیاری سیاسی بۆ مانەوە لە حکومەتدا، یان کشانەوە، هاوڕێیانمان لە حکومەتدا نوێنەرایەتیی گۆڕان دەکەن و ئەرکی فەرمی بەڕێوەدەبەن”.
ژوورەكە دووپاتیكردووەتەوە، هەر کاتێک بزوتنەوەی گۆڕان بڕیاری کشانەوە لە حکومەت بدات، تیمەکانیان پێوەی پابەند دەبن.
