سه‌رۆك كۆمارى عێراق واده‌ى یه‌كه‌م دانیشتنى خولی نوێی ئەنجومەنی نوێنەرانی عێراقی دیاریكرد، هیواداریشه حكومه‌تێكى نیشتمانیی به‌هێز پێكبهێنرێت.
له نووسراوێكدا به‌رهه‌م ساڵح سه‌رۆك كۆمارى عێراق ڕۆژى 9ى كانوونى دووه‌مى وه‌كو یه‌كه‌م دانیشتنى خولی نوێی ئەنجومەنی نوێنەرانی عێراق دیاریكردووه.
سه‌رۆك كۆمار لەگەڵ بڵاوكردنەوەی نووسراوی تایبەت بە دانیشتنەكە، له تویتێكدا نووسیویه‌تى، “واژوومان له‌سه‌ر نووسراوی كۆماری كرد بۆ بانگهێشتكردنى ئەنجومەنی نوێنەرانی نوێ، تاوه‌كو له 9ى كانوونى دووه‌مدا دانیشتنى خۆی ئه‌نجام بدات”.
بەرهەم ساڵح هیواخوازە دانیشتنی یەكەمی خولی نوێی ئەنجومەنی نوێنەران سەرەتا بێت بۆ پێكهێنانی “حكومه‌تێكى نیشتمانیی به‌هێز، كه تواناى پاراستنى به‌رژه‌وه‌ندییه‌كانى وڵات و سه‌روه‌رییه‌كانى هه‌بێت و پارێزه‌ر و خزمه‌تكارى عێراقییه‌كان بێت”.
