چێوەی هەماهەنگی نووسراوێكی فەرمیی ڕادەستی دەستەی سەرۆكایەتیی ئەنجومەنی نوێنەران كرد كە 126 پەرلەمانتاری بەشدارنەبوونی دانیشتنەكە واژوویانكردووە.
نوسراوەكە لەلایەن ئەحمەد ئەسەدی، ئەندامی ئەنجومەنی نوێنەران ڕادەستی دەستەی سەرۆكایەتی كرا، ئەمەش هاوكات لەگەڵ چوونی دەستەی سەرۆكایەتی و بەشێك لە فراكسیۆنەكان بۆناو هۆڵی ئەنجومەن و لێدانی زەنگی چوونە ژوورەوە.
بەپێی زانیارییەكانی تۆڕی میدیایی ئێستا كە لەناو هۆڵی دانیشتنەكەوە بەدەست گەیشتووە تائێستا نزیكەی 190 ئەندام لە هۆڵی ئەنجومەنی نوێنەران ئامادەن، بەهۆیەوە بۆ جاری دووەم زەنگی چوونە ژوورەوە لێدرا.
نزیكەی 10 پەرلەمانتار لەنێوان هەردوو بەرەكەدا ماونەتەوە كە نە واژووی نوسراوەكەیان كردووە و نە چوونەتە هۆڵی دانیشتنەكەوە.
بڕیاربوو دانیشتنەكەی ئەمڕۆی ئەنجومەنی نوێنەران كاتژمێر 11 بەڕێوەبچێت، بەڵام كۆنەبوونەوەی پەرلەمانتاران بووە هۆی دواخستنی بانگێشتكردنیان.
بەهۆی ئامادەبوونی ڕێژەی یاساییەوە دەستەی سەرۆكایەتی دەنگی لەسەر زیادكردنی بڕگەیەك بۆ دانیشتنەكە دا كە بریتییە لە “دەنگدان بە ئەندامانی لیژنەی دارایی”.
دەقی نوسراوەكە:
