دوای ئەوەی دوێنێ پڵنگێك لە گوندێكی زاخۆ دوای كەوتنە تەڵە و پەلاماردانی دوو هاوڵاتی هەڵهات، ئەمڕۆ لەڕێی دەرزیی بێهۆشكەرەوە گیرا.
سلێمان تەمەر، سەرۆکی ڕێکخراوی کوردستان بۆ پاراستنی مافی ئاژەڵان بە تۆڕی میدیایی ئێستای ڕایگەیاند، کاتژمێر 11ی پێش نیوەڕۆی ئەمڕۆ ئەو پڵنگەی دوێنی کەوتبووە تەڵەیەكەوە و دواتر هەڵهات، لە گوندی زرێزەی سەر بە قەزای باتیفا لە سنووری ئیدارەی سەربەخۆی زاخۆ لەلایەن ڕێکخراوەكەیانەوە بە هاوکاری هێزەكانی دارستان و ژینگە بەلێدانی دەرزی بێهوشکەر بە زیندوویی گیرا.
وتیشی، “بەهۆی تەڵەكەوە پڵنگەكە پێی لای ڕاستی لەدەستداوە و خەریکی چارەسەرکردنین و دەگوازرێتەوە بۆ باخچەی ئاژەڵان لە دهۆک، بەهۆی لەدەستدانی پێی هەر لەوێ دەیهێڵینەوە”.
دوای ئەوەی بەر لە چەند ڕۆژێك 25 سەرمەڕی هاوڵاتییەكی گوندی زرێزە لەناوچوون و خوران، هاوڵاتییەكە وایزانیووە پەلامارەكە لەلایەن گورگەوە ئەنجامدراوە، بۆ ئەو مەبەستە تەڵەیەكی داناوە و دوای سێ ڕۆژ ئەو پڵنگە كەوتە ناو تەڵەكەوە.
دوای ئەوەی ژمارەیەك لە هاوڵاتییانی گوندەكە بۆ كردنەوەی تەڵەكە چوونە شوێنەكە، پڵنگەكە دوو هاوڵاتی برینداركرد و دواتر هەڵهات، تا ئەوەی ئەمڕۆ گیرا.
