پاسپۆرتی سلێمانی لە ساڵى نوێوە ئاڵوگۆڕ بەسەر دەوامى بەڕێوەبەرایەتییەکەدا ده‌هێنێت و دەیكاتەوە بە به‌یانیان.
له ڕاگه‌یه‌ندراوێكدا، پاسپۆرتی پارێزگای سلێمانی هاوڵاتییانی پارێزگای سلێمانی و هەڵەبجە و ئیدارە سەربەخۆکانی سەر بە سلێمانی ئاگاداركردووه‌ته‌وه، سەرجەم مامەڵەکانی دەرهێنان و نوێکردنەوە و وەرگرتنەوەی پاسپۆرت لە ڕۆژی 2ى مانگی كانوونی دووەمەوە، کە یەکەم ڕۆژی دەوامی ساڵی نوێیە، لە کاتژمێر 9:00ی بەیانی تاکو 2:30 خولەکی پاشنیوه‌ڕۆ ده‌بێت.
بەپێی ئاگاداریی بەڕێوەبەرایەتییەكە، گۆڕانکارییەکان لە کاتی دەوامدا ئەم نووسینگانە دەگرێتەوە، (نووسینگەی پاسپۆرتی سلێمانی/1 – نووسینگەی پاسپۆرتی سلێمانی/2 کەلار - نووسینگەی پاسپۆرتی سلێمانی/3 ڕاپەڕین – نووسینگەی پاسپۆرتی سلێمانی/5 چەمچەماڵ)ی بەڕێوەبەرایەتیی پاسپۆرتی پارێزگای سلێمانی و بەڕێوەبەرایەتیی پاسپۆرتی هەڵەبجە.
پاسپۆرتى سلێمانى داوا لە هاوڵاتییانیش دەکات، لەکاتی دیاریکراودا سەردانیان بکەن بە مەبەستی جێبەجێکردنی مامەڵەکانیان.
گۆڕانكاریكردن لە دەوامی پاسپۆرتی سلێمانی دوای ئەوە دێت، لەماوەی ڕابردوودا و بە چەند هۆكارێك، بەڕێوەبەرایەتییەكە دەوامی كردبووە دوای نیوەڕۆ.
