زیاتر لە 6300 گەشتی ئاسمانی لە جیهاندا لەماوەی پشووی بۆنەكانی سەری ساڵ لە كۆتایی هەفتەدا هەڵوەشێندرانەوە و هەزاران گەشتی دیكەش دواخران، وەك ئەوەی ماڵپەڕی (فلایت ئەوێر)ی تایبەت بە گەشتەكان بڵاویكردووەتەوە، لەكاتێكدا بڵاوبوونەوەی گۆڕاوی ئۆمیكرۆن ناسەقامگیریی لە گەشتەكاندا دروستكردووە و كاریگەریی لەسەر ملیۆنان كەس دروستكردووە.
لە ویلایەتە یەكگرتووەكان پێشبینی دەكرێت خراپیی دۆخی كەشوهەوا ببێتە هۆی دووهێندە تێكچوونی ئەو دۆخەی فڕۆكەخانەكانی ڕۆژئاوای وڵاتەكەی گرتووەتەوە.
ماڵپەڕی (Flightaware.com) بڵاویكردەوە، نزیكەی 2800 گەشتی ئاسمانی لە جیهاندا تەنها ڕۆژی شەممە هەڵوەشێندراونەتەوە، لەنێویاندا زیاتر لە 970 گەشتیان هاتن یان چوون بوون بۆ فڕۆكەخانەكانی ویلایەتە یەكگرتووەكان، ژمارەی گەشتە دواخراوەكانیش گەیشتوونەتە هەشت هەزار.
ڕۆژی هەینیش نزیكەی 2400 گەشت هەڵوەشێندرانەوە، هەروەها دواخستنی نزیكەی 11 هەزار گەشت ڕاگەیەندرا.
ماڵپەڕەكە ڕەتكردنەوەی زیاتر لە 900 گەشتی بڕیاردراوی ڕۆژی شەممەشی تۆماركردووە.
لەلایەن فڕۆكەوان و پێشوازیكاران و فەرمانبەرانی دیكەوە داوای مۆڵەتی نەخۆشییان كردووە، یان ناچاربوون خۆیان كەرەنتین بكەن دوای تیكەڵبوونیان لەگەڵ تووشبووان بە كۆرۆنا، یان تووشی پەتاكە بوون، ئەمەش كۆمپانیاكانی (لوفتهانزا، دەلتا، یونایتد ئێرلاینز و جێت بلو) و ژمارەیەكی زۆری دیكەی كۆمپانیاكانی فرۆكەوانی، كە بەدەست كەمی فڕۆكەوان و كارمەندانیانەوە دەناڵێنن، ناچاركردووە گەشتەكانیان لەم ماوەیەی ساڵدا، كە گەشتكردن دەگاتە ترۆپك، هەڵبوەشێننەوە.
كۆمپانیای یونایتد ڕۆژی هەینی لە ڕاگەیەندراوێكدا ئاشكرایكرد، “بەرزبوونەوەی ژماری تووشبووان بە ئۆمیكرۆن لەسەر ئاستی وڵات كاریگەریی ڕاستەوخۆی دەبێت لەسەر تیمەكانمان و ئەو كەسانەی كاروبارەكانمان بەڕێوەدەبەن”.
بۆیە كۆمپانیاكە وتی، “بەو هۆیەوە بەداخەوە ناچاربووین بە هەڵوەشاندنەوەی بەشێك لە گەشتەكان و ئاگاداركردنەوەی خوازیارانی گەشتەكان بەر لە هاتنیان بۆ فڕۆكەخانە”.
