وەزارەتی ناوخۆی عێراق لێکۆڵینەوە لەزۆربوونی دیاردەی خۆکوشتن دەکات

وەزارەتی ناوخۆی عێراق لیژنەیەکی دروستکردووە بۆ بەدواداچوون بۆ دیاردەی ‏خۆکوشتن کە لە وڵاتەكە “لەبەرزبوونەوەیەکی زۆردایە”.‏

خالد محەنا وتەبێژی وەزارەتی ناوخۆی عێراق لە لێدوانێكی ڕۆژنامەوانیدا بۆ ئاژانسی ‏هەواڵی فەرمیی عێراق – واع ڕایگەیاندووە، لە ئەنجامی بەرزبوونەوەی زۆری دیاردەی ‏خۆکوشتن لەسەرتاسەری وڵاتدا، وەزارەتەكە ژمارەیەک ڕێکاری گرتووەتەبەر، لەوانە، ‏پێکهێنانی لیژنەیەک بۆ لێکۆڵینەوە لە زیاتربوونی دیاردەكە، هەروەها بەدواداچوون بۆ ‏ڕێژەی خۆکوشتن و بەراوردکردنی بە وڵاتانی دەوروبەر، لێکۆڵینەوە لە هۆکارەکانی و ‏هەنگاو بۆ دەرچوون لێی.‏

وتەبێژی وەزارەتی ناوخۆی عێراق ڕوونیکردووەتەوە، ڕێژەی خۆکوشتن لە ساڵی ‏‏2021دا 772 حاڵەت بوون، زیاتر لە 100 حاڵەتی لە ساڵی ڕابردوو زیاترە، كە 663 ‏حاڵەتی خۆكوشتن بوون.‏

ئاماژەی بەوەشکردووە، لەسەرەتای ساڵی 2016ـەوە حاڵەتەکانی خۆکوشتن ڕووی لە ‏هەڵکشان کردووە، لە ساڵی 2016دا حاڵەتەکانی خۆکوشتن 393 حاڵەت بوون، لە 2017 ‏گەیشتووەتە، 462 حاڵەت، لە 2018دا بەرزبووەتەوە بۆ 530 حاڵەت و لەساڵی 2019دا ‏گەیشتووەتە 605 حاڵەتی خۆکوشتن.‏

هەر بەپێی وتەبێژەكەی ناخۆی عێراق، ئەو تەمەنانەی دیاردەی خۆکوشتنیان تێدا ‏تۆمارکراوە بەمشێوەیەیە، ئەوانەی تەمەنیان لەخوار 20 ساڵەوەیە ڕێژەی خۆکوشتن ‏‏36.6% بووە، ئەوانەی تەمەنیان لەنێوان 20 بۆ 30 ساڵدایە ڕێژەکەی 32.2% دەبێت، ‏هەروەها لەناو ڕەگەزی نێردا ڕێژەکە نزیكەی 56% و لەناو ڕەگەزی مێدا نزیكەی 44% ‏دەبێت، هەروەها ڕێژەی خۆکوشتن لەناو ئەوانەی خێزاندارن 40%ـە و ئەوانەی سەڵتن ‏ڕێژەکە 55% دەبێت.‏

سەبارەت بە هۆکارەکانی خۆکوشتن، وتەبێژی وەزارەتی ناوخۆی عێراق ‏ڕوونیکردووەتەوە، هۆکارە دەروونییەکانی وەک فشاری دەروونی ڕێژەی 36.22%ی ‏هۆکارە پاڵنەرەکانی خۆکوشتنە، هۆکاری لادان و نەخۆشییە دەروونییەکان ڕێژەی ‏‏34.64% پێکدەهێنێت، هەروەها توندوتیژیی خێزانی و هۆکاری ئابوری و هەژاری ‏ڕێژەی 13%ی بەردەکەوێت، هەروەها بێکاری 9.5% پێکدەهێنێت، هۆکارەکانی خوێندن ‏ڕێژەی 13.38% و شکستهێنان لەپرۆسەی خوێندن ڕێژەی 5.5%ی هۆکارە پاڵنەرەکانی ‏خۆکوشتن پێکدەهێنێت.‏