هەوڵی درێژەدان بە خوێندنی ڕۆژنامەنوسە بەندكراوەكانی بادینان لەلایەن بەرپرسانی بەندینخانەكەیانەوە ڕێگری لێدەكرێت، وەك ئەوەی نوێنەری زیندانییان باسیدەكات و دەشڵێت، گروپێكی دیكە لە چالاكوانانی دەستگیركراو دۆخی دەروونییان خراپە و بەتوندی ئەشكەنجەدراون.
ئەیھان سەعید، چاودێری مافی مرۆڤ و نوێنەری زیندانیانی بادینان ڕاگەیەندراوێكی بڵاوكردەوە و تیایدا دەڵێت، دەسەڵات بەردەوامە لە پێشێلکاری بەرامبەر زیندانیانی بادینان و ئەمجارە ڕێگری لە خوێندنی زانکۆیان دەکرێت.
دەشڵێت، بەداخەوە لە تازەترین پێشێلکاری لەلایەن دەسەڵاتی ئەمنیی پارتی ڕێگری لە خوێندنی ئەو ڕۆژنامەنوس و چاکوانانە دەکرێت کە پێشتر لە زانکۆی لوبنانی – فەڕەنسی وەرگیرابوون، بەرپرسانی چاکسازی پێیان وتوون بەشی خوێندنی خۆیان بگۆڕن، دواتر زانکۆکە بە بیانوی نەبوونی خوێندکاری پێویست خوێندنەکەیان ڕاگرتووە، بەڵام رۆژنامەنوسان دەڵێن “ڕاست نیە و خوێندکاری پێویست ھەیە و ئەوانەی ئێمەیان بە نایاسایی ڕفاند و حوکمداین ڕێگرن لە بەرامبەر خوێندنمان”.
ڕوونیشیكردوەتەوە، ڕۆژنامەنوسە زیندانیەكانی بادینان (شێروان شێروانی، گۆهدار زێباری، هاریوان عیسا و شڤان سەعید بەرۆشكی) بەمەبەستی سوودبینین لەو ماوەیەی لە زیندانن بڕیاریانداوە بخوێنن، بۆ ئەو مەبەستەش زانكۆی لوبنانی – فەڕەنسی لە هەولێر دەرفەتێکی بە داشکاندنەوە بۆ ڕەخساندوون و وەرگیران و هەفتانە مامۆستایانی زانكۆكە، وانەكان دەگەیەنن بەدەستی ڕۆژنامەنوسەكان. بەر لەوەی ڕووبەڕووی ئەو ڕێگرییە ببنەوە.
ئەیھان سەعید باس لە دۆخی بەشێكی دیكەی بەندكراوان دەكات و لە ڕاگەیەندراوەكەدا دەڵێت، زیاتر لە ساڵێکە پێنج لە زیندانیانی بادینان کە خەڵکی شێلادزێن و چالاکوانی مەدەنین و لە ئاسایشی گشتیی ھەولێرن بە ناوەکانی (مەحمود ناجی، ئەمجەد یوسف، نێچیرڤان بەدیع، یوسف شەریف و کۆڤان تارق) “بە توندی ئەشکەنجەدراون و دۆخی دەرونیان خراپە، تائێستاش دۆسیەکەیان ڕەوانەی دادگا نەکراوە، ڕێگەشیان پێنەدراوە پارێزەریان ببینن”.
