سەرچاوەکانی هەواڵ لە فەرەنساوە ئاماژە بە ڕێککەوتنی نێوان ئیدارەی یانەی بەرشلۆنە و عوسمان دێمبیلی دەکەن، سەبارەت بە نوێکردنەوەی گرێبەستی نێوانیان.
بەپێی زانیارییەکانی تۆڕی “فوت میرکاتۆ”، دوای ماوەیەک لە دوودڵی و ساردبوونەوەی پەیوەندییەکان، عوسمان دێمبیلی بڕیاریداوە لە یانە کەتەلۆنییەکە بەردەوامبێت و ڕوو لە هیچ یانەیەکی دیکە نەکات.
سەرباری مکوڕبوونی لێپرسراوی کارەکانی لەسەر ڕۆیشتن و ڕێککەوتن لەگەڵ یانەیەکی دیکە، عوسمان دێمبیلی لەگەڵ بەڕێوەبەرانی یانەی بەرشلۆنە دانوستاندنی کردووە و بڕیاریداوە بۆندەکەی لەگەڵ ئەو یانەیە نوێبکاتەوە، هەروەها بڕیاریشیداوە سەرجەم ئەو ئۆفەرانە ڕەتبکاتەوە کە گرانبەهان و لە یانە گەورەکانی ئینگلتەرا و ئیتاڵیا و ئەڵمانیاوە بەدەستی گەیشتووە.
فوت میرکاتۆ نووسیویەتی، دێمبیلی دەیەوێت لە بارسا بەردەوامبێت، بەهیچ شێووەیەک بیری لە ماڵئاواییکردن نەکردووەتەوە، لە بەرامبەردا چاڤی هێرناندێز دۆخی یاریزانەکەی بەدڵە و بەردەوام بە شانوباڵیدا هەڵدەدات، بەتایبەت دوای ئەوەی بەرامبەر یانەی ئیشبیلیە ئاستێکی ناوازەی پێشکەشکرد.
