به‌هۆی ڕه‌شه‌با و به‌فربارینه‌وه دوو ڕۆژه جموجۆڵی بازرگانى له مه‌رزی كێلێ له سنووری ئیداره‌ى ڕاپه‌ڕین وه‌ستاوه.
په‌یامنێری تۆڕی میدیایی ئێستا له سنووری ڕاپه‌ڕین گواستیه‌وه، ماوه‌ى دوو ڕۆژه جموجۆڵی بازرگانى له ڕێگه‌ى مه‌رزى كێلێ به‌هۆی به‌فربارین و ڕه‌شه‌باوه وه‌ستاوه.
وتیشی، هه‌ر به‌هۆی ڕه‌شه‌باوه چه‌ند ستوونێكى كاره‌با له‌سه‌ر ڕێگای مەرزەكە كەوتوون، بۆیە تیمه‌كانى شاره‌وانىی قه‌ڵادزێ نێردراونه‌ته مه‌رزه‌كه بۆ پاككردنه‌وه‌ى ڕێگاكه تاوه‌كو جارێكى دیكه جموجۆڵه بازرگانییه‌كان ده‌ستپێبكەنه‌وه.
به‌پێی ڕاگه‌یه‌ندراوێكى كه‌شناسیی هه‌رێم، له مه‌رزی كێلێ 20 سانتیمەتر به‌فر باریوه.
کێلێ مەرزێكی نافەرمییە، دەكەوێتە سنووری قەزای پشدەر و هاوسنوورە لەگەڵ كۆماری ئیسلامیی ئێران، ڕۆژانە زیاتر لە 100 بارھەڵگر لەوێوە دێنە ھەرێمی کوردستان و بژێویى ژیانى سه‌دان كرێكاریشی له‌سه‌ره.
