ڕافائێل نادال یاریزانی تێنسی ئیسپانیا، تووشبوونی خۆی بە كۆرۆنا ڕاگەیاند.
نادال هەواڵەكەی لە تویتەرەكەی خۆیەوە ڕاگەیاند و نووسیویەتی، “سڵاوتان لێبێت، دەمەوێت ڕایبگەیەنم كە دوای گەڕانەوەم بۆ نیشتمان لەپاش بەشداریكردنم لە پاڵەوانێتیی ئەبو زەبی، پشكنینەكان تووشبوونمیان بە كۆرۆنا سەلماند دوای گەیشتنەوەم بە ئیسپانیا”.
هاوكات ڕۆژنامەی ماركا بڵاویكردەوە، “نادال پێنجەم یاریزانی دەستەبژێری تێنسی ئیسپانیا، دووچاری كۆرۆنا بووە و ئەنجامی پشكنینەكەی پۆزەتیڤ دەرچووە، دوای ئەوەی هەریەك لە فێرناندۆ فێرداسكۆ، كارلۆس ئەلكارازن، ئەلیخاندرۆ داڤیدیۆڤیچ و ڕۆبێرتۆ كاربالیس تووشی كۆرۆنا بوون”.
بەپێی سەرچاوەكان، تووشبوونی نادال بە كۆرۆنا نسكۆیەكی مەترسیدارە و هەڕەشەیە بۆسەر گەشتەكەی بۆ ملبۆرن كە بڕیارە لە 29ی ئەم مانگەدا ڕوو لە ئوسترالیا بكات، بەمەبەستی بەشداریكردن لە پاڵەوانێتیی ئوسترالیا كە ڕۆژی چواری كانونی دووەمی ساڵی داهاتوو دەستپێدەكات.
