بەڵگەنامەکانی وەزارەتی بەرگریی ئەمریکا دەریانخستووە، ئەو هێرشانەی ئەمریکا لە ساڵی 2014وە لە خۆرهەڵاتی ناوەراست ئەنجامیداون، بوونەتە هۆی کوشتنی هەزاران هاوڵاتیی مەدەنی.
ڕۆژنامەی نیویۆرک تایمزی ئەمریکی بڵاویکردەوە، هێرشەکانی ئەمریکا کە لە خۆرهەڵاتی ناوەڕاست ئەنجامیداون “پشتبەست بە زانیاریی هەواڵگریی ورد”، هەزاران مەدەنییان لەو ناوچانە کوشتووە، کە زۆرینەیان منداڵن.
بەپێی ڕۆژنامەکە، ئەو بەڵگەنامانەی پێنتاگۆن، کە بەشێکی زۆریان نهێنین و زیاترن لە هەزار و 300 بەڵگەنامە، باس لە کوژرانی هەزاران هاوڵاتیی مەدەنی دەکەن، لەکاتێکدا ئەمریکا بانگەشەی ئەنجامدانی هێرشەکانی لەڕێگەی مووشەکی ئاراستەکراوی ورد و بێهەڵە دەکات.
ڕاپۆرتەکەی ڕۆژنامە ئەمریکییەکە باس لەوە دەکات، “بەڵێنەکانی شەفافییەت و لێپرسینەوە لەو حاڵەتانە بەبێ جێبەجێکردن ماونەتەوە، تائێستا کەس لەسەر هەڵەیەکی لەوجۆرە دوورنەخراوەتەوە یان ڕێکاری بەرامبەر نەگیراوەتەبەر”.
نیویۆرک تایمز دەڵێت، ئەو بەڵگانەی بڵاویکردوونەتەوە بەشی یەکەمی بەڵگەکانە و بەردەوام دەبن لە بڵاوکردنەوەیان.
لە بەڵگەنامەکاندا هاتووە، لە هێرشەکانی 19ی تەموزی 2016 کە ئەمریکا لە سێ ناوچەی باکووری سوریا ئەنجامیدا، بەمەبەستی کردنەئامانجی چەکدارانی داعش، 120 گوندنشین و جوتیاری ئەو ناوچەیە لە هێرشەکەدا گیانیان لەدەستداوە.
هەروەها لە مانگی تشرینی دووەمی 2015 هێرشێکی دیکەی لە ڕومادی-ی عێراق ئەنجامدا بۆسەر ناوچەیەکی داعش، بەهۆیەوە منداڵێک گیانیلەدەستدا.
لە هێرشێکی دیکەدا کە بەمنزیکانە لە کابول-ی پایتەختی ئەفغانستان و لە مانگی ئابی ئەمساڵدا لەڕێگەی فڕۆکەیەکی بێفڕۆکەوانەوە ئەنجامیدا، ئۆتۆمبێلێک بۆردوومانکرا و بەهۆیەوە 10 ئەندامی یەک خێزان گیانیان لەدەستدا.
هەر بەپێی ڕاپۆرتەکە، زۆرینەوەی ئەو کەسانەی بەهۆی هێرشەکانەوە برینداربوون بۆ چارەسەر پێویستیان بە تێچوویەکی زۆرە، لەکاتێکدا تائێستا “بەپێی ڕۆژنامەی نیویۆرک تایمز” تەنها 12 کەسیان قەرەبوو کراونەتەوە.
کاپتن بیڵ ئۆربان وتەبێژی فەرماندەیی ناوەندیی ئەمریکا لەوبارەیەوە دەڵێت، ئەو حاڵەتانە لە هێرشەکاندا ڕوودەدەن، تەنانەت ئەگەر بە زیرەکترین چەکە پێشکەوتووەکانیش بکرێن، هۆکارەکەشی بۆ ورد و دروستنەبوونی تەواوەتیی زانیارییەکان، یان شیکاریی هەڵە بۆ زانیارییەکان، یان هەڵەی زانیاری دەگەڕێتەوە و “هەوڵدەدەین لەو هەڵانەوە ئەزموون وەرگرین”.
بەپێی راپۆرتەکە، ئەمریکا لە پێنج ساڵی رابردوودا زیاتر لە 50 هەزار هێرشی ئاسمانیی لە عێراق و ئەفغانستان ئەنجامداوە، ڕۆژنامەکە دەڵێت لەڕێگەی پەیامنێرەکانیەوە سەردانی زیاتر لە 100 ناوچەیان کردووە، کە ئەمریکا هێرشی بۆسەر ئەنجامداون.
