لەلایەن تیمەكانی فەرەنساوە 138 كۆچبەر لەنزیك گەرووی (با دو كالیە) لە كەناڵی مانشی نێوان فەرەنسا و بەریتانیا ڕزگاركران، دوای ئەوەی هەوڵی پەڕینەوەیان دابوو و بەلەمەكانیان لەكاركەوتبوو.
بەڕێوەبەرایەتیی ئاسایشی مانش و دەریای باكووری فەرەنسا لە ڕاگەیەندراوێكدا ئاشكرایكرد، ناوەندی هەرێمایەتیی پرۆسەكانی چاودێری و ڕزگاركردن لە (گری-نیە) ئاگاداركرایەوە، كە ژمارەیەك بەلەم كە هەوڵی پەڕینەوە لە كەناڵەكە دەدەن، لە گەرووەكەدا ڕووبەڕووی ئاستەنگ بوونەتەوە.
ئاماژەی بەوەشكرد، بەهۆیەوە دوو كەشتی سەر بە دەریایی نیشتمانیی فەرەنسا و دوو بەلەمی سەر بە كۆمەڵەی نیشتمانیی ڕزگاركردنی دەریایی، نزیكەی 138 كۆچبەریان ڕزگاركردووە و گەڕاندویاننەتەوە بۆ كەناراوەكانی فەرەنسا.
لە كۆتایی ساڵی 2018وە هەوڵەكانی تێپەڕاندنی مانش بە ئاراستەی بەریتانیا زیادیانكردووە، سەرەڕای هۆشدارییە بەردەوامەكانی دەسەڵاتداران دەربارەی مەترسیی ئەم جۆرە لە كۆچ بەهۆی چڕی جموجوڵ و شەپۆلە بەهێزەكان و هەوای ساردی ناوچەكەوە.
بەپێی دەسەڵاتدارانی فەرەنسا لە هەشت مانگی یەكەمی ئەمساڵدا نزیكەی 15 هەزار و 400 كۆچبەر هەوڵی پەڕینەوەیان لە كەناڵی مانش داوە، لەنێویاندا 3 هەزار و 500یان ڕووبەڕووی دژواری بوونەتەوە كاتێك ڕزگاركراون و گەڕێندراونەتەوە بۆ كەناراوەكانی فەرەنسا.
ئەم ژمارەیە زیادبوونی بەرچاوی ژمارەی كۆچبەرانی نایاسایی لە فەرەنساوە بەرەو بەریتانیا نیشاندەدات بەراورد بە ساڵانی پێشوو، لە كۆی ساڵی 2020دا تێپەڕبوون یان هەوڵی پەڕینەوەی نزیكەی 9 هەزار و 500 كۆچبەر تۆماركراوە، بەراورد بە 2 هەزار و 300 كۆچبەر لە 2019 و 600 كۆچبەر لە 2018.
