نەخۆشخانەی منداڵانی سلێمانی بەدەست کەمی کارمەندەوە دەناڵێنێت، بەڕێوەبەری نەخۆشخانەكە دەڵێت، سێ بەشی نوێ كراوەتەوە، بەڵام كارمەندیان كەمیكردووە و لۆدێكی زۆریان لەسەرە.
دكتۆر پشدەر عەبدوڵا، بەڕێوەبەری نەخۆشخانەی دکتۆر جەمال ئەحمەد ڕەشیدی منداڵانی فێرکاری لە سلێمانی ڕایگەیاند، پێش دەستپێکردنی نۆژەنکردنەوە و کردنەوەی بەشی تازە تەنها سێ نهۆمی نەخۆشخانەکە نەخۆشی تێدا دەخەوێنرا، بەڵام دوای نۆژەنکردنەوە و فراوانکردنی نەخۆشخانەکە لەئێستادا شەش بەش واتە دوو ئەوەندەی جاران بەشەکانی نەخۆشی تێدا دەخەوێنرێت. لەداهاتوویەکی نزیکدا بەشێکی تریش دەکرێتەوە و دەخرێتە خزمەت منداڵان.
وتیشی، “بەداخەوە لەگەڵ زیادبوونی توانای وەرگرتنی نەخۆش بۆ دوو ئەوەندە کارمەندمان نەک زیادی نەکردووە، بەڵکو بەپێچەوانەوە بەهۆی خانەنشینکردن و بەشێکیشیان بەهۆی گواستنەوەیان زۆر کەمی کردووە”.
دەربارەی دۆخی كارمەندەكانی ئێستای نەخۆشخانەكەش پشدەر عەبدوڵا دەڵێت، “کارمەندەکانمان زۆر هیلاکن و ماندوون بەهۆی لۆدێکی زۆری نەخۆش” و دەپرسێت، لە کام نەخۆشخانەی دونیادا هەیە یەک کارمەند فریای چارەسەری پانزە بۆ بیست نەخۆش بکەوێت؟ “لەکاتێکدا بەشێک لە کارمەندەکانمان تەمەنیان زۆرە و وەک پێویست توانای جارانیان نیە”.
لەدوای قەیرانی دارایی هەرێمی كوردستانەوە دامەزراندن ڕاگیراوە، بەڕێوەبەری نەخۆشخانەی منداڵان دەڵێت، چەندین جار داوایانکردووە دامەزراندن بکرێتەوە بەتایبەت بۆ نەخۆشخانەکە ئەوان، بەڵام نەكراوە.
