ژمارەیەك وێنەی مانگە دەستكردەكان ئەوە پیشاندەدەن، ئێران هاوكات لەگەڵ دەستپێكردنەوەی گفتوگۆ ئەتۆمییەكان و بەڕێوەچوونی گەڕێكی دیكە، دەیەوێت مانگێكی دەستكرد ڕەوانەی بۆشایی ئاسمان بكات.
ئاژانسی هەواڵی ئیرنای ئێرانی ئاشکرایکردووە، ئێستا ئێران چوار موشەکی ئامادەیە بۆ هەڵدان بەرەو بۆشایی ئاسمان، ئەو ئامادەکارییەش لە بنکەی ئاسمانیی “ئیمام خومەینی”یەوە تەواو بووە.
هاوکات ئاژانسی ئەسۆشیەیتد پرێس، لەگەڵ بڵاویکردنەوەی بەڵگەوێنەیەکی بنکەی ئاسمانیی “ئیمام خومەینی” کە لە ئاسمانەوە گیراوە، دەڵێت، “ئێران ئامادەی هەڵدانی مانگە دەستکردەکەیەتی”.
بنکەی ئاسمانیی “ئیمام خومەینی” دەكەوێتە بیابانێکی پارێزگای “سمنان” لە ٢٤٠ کیلۆمەتری باشووری ڕۆژهەڵاتی تاران.
ئاژانسی ئیرنای ئێرانی پێشتر ڕایگەیاندبوو، “چوار موشەکی دروستکراوی ناوخۆیی و کەرەستەکانی هەڵدانی مانگی دەستکرد ئامادەیە و گەیشتووەتە بنکە ئاسمانییەکە.
ماوەی دوو ساڵ دەبێت ئێران ئامادەی هەڵدانی مانگی دەستکردە، ئێستا ئاژانسە هەواڵییەکانی ئەو وڵاتە ئاشکرایدەکەن “جگە لە مانگی دەستکردی (ظفر دوو)، (ناهیدی یەک و دوو)ش ئامادەی هەڵدانن”.
بەشێک لە وڵاتە عەرەبییەکان و ئیسرائیل دەیانەوێت ئاستی دەستگەیشتنی ئێران بە مانگی دەستکرد و توانا مووشەکییەكەی سنووردار بکرێت، چونکە ترسیان هەیە توانای هەڵدانی مانگی دەستکرد بەکاربهێنرێت بۆ مووشەکی ئەتۆمی.
پێشتر چەند جارێك ئێران هەوڵی هەڵدانی مانگی دەستكردنی داوە بۆ جێگیركردنی لە بۆشایی ئاسمان، بەڵام سەركەوتوو نەبووە.
