هێرشێكی موشەكی كرایە سەر فڕۆكەخانەی كابول و لەلایەن سیستمی بەرگریی موشەکیی ئەمریکی تێکشکێندرا، تاڵیبانیش دەڵێت، بەمنزیكانە فڕۆكەخانەكە بە تەواوی دەكەوێتە ژێركۆنترۆڵی ئەوانەوە.
ئاژانسی ڕۆیتەرز، لەزاری بەرپرسێكی ئەمریكییەوە گواستیەوە، سەرلەبەیانی ئەمڕۆ دووشەممە پێنج موشەک ئاراستەی فڕۆکەخانەی کابول كراوە و سیستمی بەرگریی موشەکی بەرپەرچی هێرشەکەی داوەتەوە و موشەکەکان تێکشکێندراون.
بە وتەی ئەو بەرپرسە ئەمریکییە، هێرشەکە هیچ قوربانییەکی هێزەکانیانی لێنەکەوتووەتەوە، گواستنەوەی خەڵکی ئەفغانستان و دیپلۆماتکارانی ڕانەگرتووە و پڕۆسەکە بەردەوامە.
لەلایەكی دیكەشەوە بزوتنەوەی تاڵیبان ڕایگەیاند، بەمنزیكانە تەواوی فڕۆكەخانەی كابول دەكەوێتە ژێر دەسەڵاتی ئەوانەوە.
بەرپرسێكی بزوتنەوەكە باسی لەوەشكردووە، ئەمریكییەكان لە چەند شوێنێكی فڕۆكەخانە كشاونەتەوە و چەكدارەكانی ئەوان كۆنترۆڵیان كردووە.
ڕوونیشیكردووەتەوە، سێ دەرگای فڕۆكەخانەی حامید كارزای نێودەوڵەتی لەلایەن تاڵیبانەوە كۆنترۆڵكراوە.
