لە پێشهاتێكی نوێدا تایبەت بە قەیرانی تایوان، چین هەڕەشەی هێرشكردنەسەر هەر هێزێكی كرد كە ویلایەتە یەكگرتووەكان بۆ بەرگریكردن لە دوورگەكە ڕەوانەی بكات، پێشبینی دەكرێت دۆسیەكە ناكۆكی و هەڵكشانەكانی نێوان واشنتن و پەكین بباتە ئاستێكی باڵاوە.
ڕۆژنامەی “گڵۆباڵ تایمز”ی چینی زمانحاڵی حزبی شیوعیی دەسەڵاتدار ڕاپۆرتێكی بڵاوكردەوە و دەڵێت، پەكین ئامادەیە بۆ هێرشكردنەسەر هەر هێزێكی ئەمریكی، ئەگەر ململانێی سەربازیی لە ناوچەكەدا سەرهەڵبدات.
هەڕەشەكەی چین دوای بەڵێنەكەی جیك سۆلیڤان، ڕاوێژكاری ئاسایشی نەتەوەیی ئەمریكا دێت، كە وتی، واشنتن “بەهیچ شێوەیەك ڕێگەنادات” بە ڕوودانی داگیركاریی چین لە تایوان.
ڕۆژنامە چینییەكە بڵاویكردەوە، “ئەم جۆرە هەڕەشانە جێی متمانە نین، بەهۆی ئەوەی ویلایەتە یەكگرتووەكان ناتوانێت تێچووی بەرگری لە تایوان لەئەستۆبگرێت”.
زمانحاڵەكەی پارتی دەسەڵاتداری چین داواش لە سۆلیڤان دەكات “دەمە گەورەكەی دابخات، تا نەبێتە هۆی ئیحراجیی زیاتری وڵاتەكەی”.
بۆ جەختكردنەوە لەسەر جددیبوونی هەڕەشەكەش، ڕۆژی هەینی چین 13 فڕۆكەی جەنگی ڕەوانەی بواری ئاسمانیی تایوان كرد، لەنێویشیاندا هەشت شەڕكەر و دوو بۆمبی ئەتۆمی و فڕۆكەیەكی سیخوری و یەكێكی دیكەی دژ بە ژێرئاوگەڕ.
لە ڕاپۆرتی ڕۆژنامەكەدا هاتووە، “واشنتن پێیوایە ناردنی هێزی ئەمریكی بۆ دوورگەكە ئاسانە، بەڵام لە ڕاستیدا بە ئاسمانی خۆیان لەژێر هەڕەشەدا دەبیننەوە”.
پەكین، تایوان بە بەشێك لە خاكەكەی دادەنێت، لەكاتێكدا ویلایەتە یەكگرتووەكان وەك پێگەیەكی گرنگی خۆی لە ناوچەكەدا تەماشای دەكات.
بەمدواییە چین فشارە سەربازی و سیاسییەكانی بۆسەر تایوان زیادكردووە بەمەبەستی قبوڵكردنی سەروەریی وڵاتەكەی لەسەری، ئەمەش توڕەیی دوورگەكەی زیادكردووە و چەندین جار دووپاتیكردووەتەوە كە ناچێتەژێر سایەی هەڕەشە و خاوەن مافی بەشدارییە لە گۆڕەپانی نێودەوڵەتیدا وەك وڵاتێكی سەربەخۆ.
