هێرشبەری پۆڵەندی-ی یانەی بایرن میونشن، ڕۆبێرت لیڤاندۆڤیسکی لێپرسراوی کارەکانی ئاگادارکردووەتەوە، لە هاوینی 2022 هەوڵ بۆ گواستنەوەی بدات بۆ یانەی ڕیاڵ مەدرید.
ڕۆژنامەی “ئەی ئێس”ی ئیسپانی بڵاویکردووەتەوە، بەهۆی پشتگوێخستنی لەلایەن گۆڤاری فرانس فوتبۆڵ و گرنگیپێنەدانی لەلایەن میدیای جیهانییەوە، بڕیاریداوە لە کۆتایی ئەم وەرزە (2021-2022) داوای دەستبەرداربوون لە یانە ئەڵمانییەکەی بکات.
لیڤا داوای لە پینی زاهاڤی لێپرسراوی کارەکانی کردووە، دەرگای دانوستان بەڕووی یانەی ڕیاڵ مەدریددا بکاتەوە، بەڵام ئەوەی کێشەیە یانەی ڕیاڵ مەدریدە کە لە دۆخێکدا نییە لیڤاندۆڤیسکی بگوێزێتەوە بۆ ڕیزەکانی.
ئەی ئێس نووسیویەتی، ڕیاڵ مەدرید هاوینی 2022 ئێرلینگ هالاند دەکاتە ئامانج، هەروەها کەریم بنزیمە هێشتا لەتوانایدایە لە ئاستێکی بەرزدا یاریبکات، لەو بارودۆخەدا گواستنەوەی “لیڤا” بۆ ڕیاڵ دەبێتە بابەتێکی مەحاڵ.
