ڕێکخراوی تەندروستیی جیهانی ئامۆژگاری لەبارەی گەشتکردن بۆ ناوچە مەترسیدارەکانی بڵاوبوونەوەی ئۆمیکرۆن بڵاودەکاتەوە و داوا دەکات ئەو کەسانەی پێشتر تووشی کۆرۆنا نەبوون، ئەوانەی نەخۆشیی مەترسیداری دیکەیان هەیە و ئەوانەی تەمەنیان سەروو 60 ساڵە گەشتنەکەن بۆ ناوچەکانی بڵاوبوونەوەی چڕی ئۆمیکرۆن.
ڕێکخراوی تەندروستیی جیهانی ڕایگەیاندووە، “ڕاگرتن و قەدەغەی گشتیی گەشتکردن ناتوانێت ڕێگری لە بڵاوبوونەوەی ڤایرۆسی ئۆمیکرۆن بکات، بەڵکو قەدەغەی گشتی کەموکوڕی و تەنگژەی زیاتر بۆ ژیان و دۆخی وڵاتانی جیهان دروستدەکات”.
بەپێی ئەو ڕێنمایی و ئامۆژگارییانەی ڕێکخراوی تەندروستیی جیهانی بڵاویکردووەتەوە، ئەوانەی هەموو دۆزەکانی ڤاکسینیان وەرنەگرتووە، ئەوانەی هیچ بەڵگەیەک نییە کە تووشی ڤایرۆسی سارس-کۆڤ-2 بووبن و چاکبوونەتەوە، ئەو کەسانەی زیاتر مەترسیی تووشبوونی توند بە کۆرۆنا و ئەگەری مردنیان لەسەرە، هەروەها ئەو کەسانەی نەخۆشیی مەترسیداریان هەیە و ئەوانەشی تەمەنیان سەروو 60 ساڵە، گەشت نەکەن بۆ ئەو وڵاتانەی ڤایرۆسی ئۆمیکرۆنیان بە فراوانی تێدا بڵاوبووەتەوە و بە مەترسیدار دادەنرێن.
قسەی تەندروستیی جیهانی لەبارەی كاریگەرنەبوونی ڕاگرتنی گەشتە ئاسمانییەكان لەكاتێكدایە، نزیكەی 58 دەوڵەتی جیهان ڕێکارەکانی هەڵپەساردنی گەشتە ئاسمانییەکانیان ڕاگەیاندووە، بەمەبەستی ڕێگریکردن لە گەیشتنی گۆراوی ئۆمیکرۆن بە وڵاتەکانیان.
