وەزارەتی تەندروستیی عێراق ئاشکرایکرد تا ئێستا زیاتر لە 19 هەزار کەس بە پێکوتەی ڤاکسینی کۆرۆنا کوتراون و ئەوەش بەباشترین ڕێگە دادەنرێت بۆ ڕێگری لە ڤایرۆسی کۆرۆنا.
بەپێی ڕاگەیەندراوێکی وەزارەتی تەندروستیی عێراق تا ئێستا 19 هەزار و 635 کەس لە عێراق پێکوتەی دژە ڤایرۆسی کۆرۆنایان وەرگرتووە، بە هەردوو جۆرە ڤاکسینەکەوە.
ئەو کەسانەی لە عێراق بە ڤاکسینی کۆرۆنا کوتراون بە هەردوو ڤاکسینی چینی (سینۆفارم) و ئەسترازێنیکای بەریتانی کوتراون و هەردوو ڤاکسینەکەش بە دوو ژەم وەردەگیرێت.
وەزارەتەکانی تەندروستیی لە عێراق و هەرێمی کوردستان ئاماژە بەوەدەکەن کە شەپۆلێکی دیکەی ڤایرۆسی کۆرۆنا ڕوی لە هەرێم و عێراق بە گشتی کردووە و ئەمڕۆ لە عێراق زیاتر لە 5 هەزار کەس توشی ڤایرۆسەکە بوون.
