بەڕێوبەری جێبەجێکاری یانەی بایرن میونشن، کارڵ هاینز ڕۆمەنیگە نوێکردنەوەی بۆندی ئالابا دەخاتە ئەستۆی یاریزانەکە و داوای لێدەکات بە خێرایی بڕیاربدات.
لەم بارەیەوە ڕۆمەنیگە بە ڕۆژنامەی بێلد سپۆرتی ڕاگەیاندووە، ” نازانین ئالابا دەڕوات یان نا، دوو هەفتە لەمەوبەر لەگەڵ جۆرجی باوکی و پینی زاهاڤی لێپرسراوی کارەکانی گفتوگۆیەکی باشمان کرد، ماوەی چەند مانگێگە لەناو بازنایەکدا دەخولێینەوە”.
هەروەها دەڵێت، ” لە ئێستادا پێویستمان بە پلاندانانە بۆ وەرزی نوێ و دەبێت بزانین، ئایا ئالابا لەگەڵماندا بەردەوام دەبێت یان نا؟ ئەو بڕیارە لەم کاتەدا بۆ بایرن گرنگە”.
ڕۆمەنیگە دەڵێت، ” بەتایبەت لەم سەردەمەدا کە کۆرۆنا زیانی گەورەی بە یانەکان گەیاندووە، پێویستە یاریزانان بیرکردنەوەیان بەرەوپێش ببەن، چونکە پارەیەکی زۆرمان لەدەستداوە و ماوەی هەشت مانگە هاندەرانمان لە یاریگاکان دابڕاون، ئێمە لەبەردەم لەدەستدانی سێ ژمارەیی گەورەترداین، پێموابێت باشترە بۆ یاریزانێک کە لە یانەکەی بەختەوەرە، بەردەوامبێت، وەک داڤید ئالابا، لێرە تاموچێژی سەرکەوتنەکان دەکات و هەمووان هەمان بۆچونمان هەیە، خۆشماندەوێت، کەسێکی باش و یاریزانێکی ناوازەیە”.
لە کۆتاییدا بەڕێوبەری جێبەجێکاری بایرن دووپاتیدەکاتەوە، یاریزانەکە “پێویستە خۆی بڕیار لەداهاتووی بدات”.
