بەهۆی زیانپێگەیشتنی ژمارەیەك هاوڵاتیی كەركوك لە پرۆژەیەكی نیشتەجێبوون، دەستەی دەستپاكیی عێراق دەڵێت، بەڕێوەبەری وەبەرهێنانی پارێزگاكە ڕاپێچی بەردەم دادگا دەكرێت.
دەستەی دەستپاكی ڕایگەیاند، ڕێوشوێنی گرتووەتەبەر سەبارەت بەو سكاڵایانەی لەلایەن ژمارەیەك لە هاوڵاتییانەوە، كە گرێبەستی كڕینی یەكەی نیشتەجێبوونیان لە یەكێك لە كۆمەڵگاكانی نیشتەجێبوونی كەركوك كردووە، پێیگەیشتووە.
بەپێی ڕاگەیەندراوێكی دەستەكە، دەستەی وەبەرهێنانی كەركوك كۆتایی بە گرێبەستی یەكێك لە كۆمپانیاكانی بەڵێندەریی تایبەت بە دروستكردنی پرۆژەی نیشتەجێبوون هێناوە، لەگەڵ كشانەوەی مۆڵەتی كاركردن و ڕادەستكردنی بە كۆمپانیایەكی دیكە، بەهۆی پابەندنەبوونی ئەوەی دووەمیان بە بەندەكانی گرێبەستەكە، زیانی گەورە بەو هاوڵاتییانە گەیشتووە كە گرێبەستی كڕینی یەكەكانیان كردووە.
ڕوونیشیكردوەتەوە، بەپێی ڕاپۆرتی دیوانی چاودێریی دارایی فیدراڵی، كەمتەرخەمی و نادروستیی ڕێوشوێنە پەیڕەوكراوەكان لەلایەن دەستەی وەبەرهێنانی كەركوك لەئارادابووە، كە بووەتەهۆی زیانگەیشتن بە هاوڵاتییان، بەهۆیەوە دادگای لێكۆڵینەوەی كەركوك، لە ئاكامی زانیارییەكانی بەردەستی، فەرمانی ڕاپێچكردنی بۆ بەڕێوەبەری وەبەرهێنانی پارێزگاكە كردووە.
فەرمانی ڕاپێچكردنەكە بەڕێوەبەری پێشووی وەبەرهێنانی كەركوكیشی گرتووەتەوە، كە دادگا داوای چارەنووسی كردووە، بەهۆی ئەوەی لە دۆسیەی دیكەدا سزای بەسەردادراوە، وەك ئەوەی لە بەشێكی دیكەی ڕاگەیەندراوەكەدا هاتووە و دەشڵێت، دادگا بڕیاری دەستبەسەركردنی گومانلێكراوی یەكەمی داوە، جگە لەوەی پێشتر بڕیارێكی دیكەی هەبووە بۆ ڕاپێچكردنی هەردوو بەڕێوەبەری بەشەكانی یاسایی، ئابوری و هونەریی دەستەی وەبەرهێنانی پارێزگا.
پێشتر دەستەی دەستپاكی ئاشكرایكرد لە 111 پرۆژەی ئاراستەكراوی دەستەی وەبەرهێنانی كەركوك، 86 پرۆژەیان كاركردن تیایاندا سفر% بووە، كە كۆمەڵگای نیشتەجێبوون، بازرگانی، هۆتێل، مۆڵ، نەخۆشخانە، زانكۆی ئەهلی و هیدیكە لەخۆدەگرێت.
