پیسبوونی هەوای نیودەلهیی پایتەختی هندستان گەیشتووەتە ڕادەیەك، ماوەی هەفتەیەك دەوام ڕادەگیرێت و شارەكە بەڕووی جموجۆڵدا دادەخرێت.
نیودەلهی كە ژمارەی دانیشتووانەكەی 20 ملیۆن كەسن، ماوەیەكە ڕووبەڕووی شەپۆلێكی پیسبوونی هەوا بووەتەوە كە وەزارەتی ژینگەی هندستان بە خراپترین و پیسترین ناویدەبات.
كارگێڕیی ویلایەتی نیودەلهی هەموو نووسینگە و فەرمانگەكانی داخستووە، داوای لە فەرمانبەرانی حكومەت كردووە ماوەی هەفتەیەك لە ماڵەوە كارەكانیان ڕابپەڕێنن، وەزارەتی ژینگەی هندستان ئامۆژگاری نووسینگە و شوێنكارەكانی كەرتی تایبەتی كردووە بەپێی توانا كارمەندەكانیان بنێرنەوە بۆ ماڵەكانیان.
ئەو پیسبوونەی لە هەوای نیودەلهیدا هاتووەتەئاراوە، وەك تەمێكی چڕی سوورباو بە شارەكەدا بڵاوبووەتەوە و جۆرێتیی هەوا بۆ ئاستێكی خراپ دابەزیوە، ئەوەش لە ئەنجامی سووتانی بەشێك لە دەغڵ و دان و پاوانی جوتیارانەوە دروستبووە كە ساڵانە وەك ئامادەكارییەك بۆ وەرزی چاندن دەیكەن و لە ماوەی چەند هەفتەیەكدا 47 هەزار ڕووداوی ئاگرتێبەردان و سووتاندن تۆماركراون.
