ئیلۆن مەسک ڕایگەیاندووە، بەرهەمێکی کۆمپانیاکەی تا ساڵی 2027 قەڵەوی و چەندین نەخۆشیی دیکەش چارەسەردەکات.
ئیلۆن مەسک ملیاردێری ئەمریکی بانگەشەی کردووە، ئەو تەکنەلۆژیای تەڵاشە(شريحة)یەی نێورالینک پەرەیپێداوە و دەخرێتە مێشکی مرۆڤەوە، دەتوانێت چارەسەری قەڵەوی و گیزەگیزی گوێ و چەندین نەخۆشیی دیکە بکات، ئەمەش لە ماوەی 5 ساڵی داهاتوودا.
هەروەها ڕوونیکردووەتەوە، تەڵاشەی ئەلیکترۆنیی مێشکەکەی Neuralink دەتوانێت ڕێ بە کۆمپیوتەر بدات ڕاستەوخۆ پەیوەندیی لەگەڵ مێشکدا دابمەزرێنێت و چالاکییەکانی بەهێز بکات.
زاناکان ئاماژەیان بەوە داوە، لەڕێی تەڵاشە ئەلیکترۆنییەکەوە دەکرێت کاریگەری بخرێتەسەر چەند بەشێکی دیاریکراوی مێشک و ڕێ لە ویستی خواردن بگیرێت.
مەسک ئەم پرسەی لە دیدارێکی پێگەی TEDدا ڕاگەیاند و قەڵەوی و چەندین نەخۆشیی دیکەی وەک پارکینسۆن و زەهایمەری خستە ئەو لیستەوە، کە داهێنانەکەی Neuralink چارەسەریان دەکات.
