یانەی ئەی سی میلانی ئیتاڵی هەنگاوی چەسپاو و گرنگی لە بوارەکانی دارایی و کارگێڕیدا ناوە، بەو شێوەیە بەردەوامبێت لە داهاتوویەکی نزیکدا دەگەڕێتەوە لوتکەی تۆپی پێ.
بەڕێوەبەری جێبەجێکار و وەرزشیی میلان، ئیڤان گازیدێس و پاولۆ ماڵدینی لەڕووی داراییەوە باشترین کاریانکردووە، تاوەکو یانەکەیان لە قەیرانی دارایی و قەیرانی سەردەمی کۆرۆنا دەربازبکەن، هاوکات لەگەڵ ئەو شۆڕشە بەهێزەی ستیفانۆ پیۆلی ڕاهێنەر لەسەر ئاستی هونەری بەرپایکردووە.
میلان لە وەرزی 2020-2021 پلەی دووەمی خولی ئیتاڵیای بەدەستهێناوە و گەڕاوەتەوە نێو گەورەکانی ئەوروپا (چامپیۆنزلیگ)، لەم وەرزەشدا و دوای تێپەڕبوونی 13 هەفتە هاوشانی ناپۆلی لوتکەی ڕیزبەندیی یانەکانی ئیتاڵیای گرتووە.
بەپێی ئەو زانیارییانەی لە ڕاپۆرتی ساڵانەی یانە لۆمپاردییەکە ئاشکراکراوە، لەدەستدانی دارایی ڕۆسۆنێری کەمیکردووە و گەیشتووەتە 96 ملیۆن یورۆ، لەکاتێکدا وەرزەکانی ڕابردوو 194.6 ملیۆن یورۆ و زیاتر بووە.
هەروەها داهاتی ساڵانەی یانە بەبڕی لەسەدا 36 زیادیکردووە و گەیشتووەتە 261 ملیۆن، لەهەمانکاتدا ڕێژەی مووچەی یاریزانانی لە ساڵی 2019 بۆ 2021 لە 196 ملیۆنەوە کردووە بە 84 ملیۆن و ئامادەش نییە سیستمە نوێیەکەی لەپێناو هیچ یاریزانێک تێکبدات.
