ئەمڕۆ ڕۆژی جیهانیی یادکردنەوەی قوربانییانی ڕووداوەکانی هاتوچۆیە، به‌پێی ئاماره‌كانى هاتوچۆی هەرێم، له‌ماوه‌ی 10 مانگى ئەمساڵدا 476 کەس لە سێ هەزار و 509 ڕووداوى هاتوچۆدا گیانیان لەدەستداوە.
ئه‌مڕۆ یه‌كشه‌ممه 21ى تشرینی دووه‌م، كه ڕۆژی جیهانیی یادکردنەوەی قوربانییانی ڕووداوەکانی هاتوچۆیه، لەلایەن نەتەوە یەکگرتووەکان و ڕێكخراوی تەندروستیی جیهانی (WHO) و چەندین ڕێكخراوی دیکە دیاریکراوە، هۆشیاریی سەلامەتیى لێخوڕین و پابەندبوون بە یاساکانى هاتوچۆ بڵاودەکرێتەوە.
به‌پێی ڕاپۆرتێکی ڕێكخراوی ته‌ندروستیی جیهانی، زۆرترین ڕێژه‌ی گیانلەدەستدان به‌هۆی ڕووداوه‌كانی هاتوچۆ له كیشوەری ئه‌فریقایه، له پله‌ی دووه‌میشدا ڕۆژهه‌ڵاتی ئاسیا دێت.
هه‌ر به‌پێی داتاكانى ته‌ندروستیی جیهانى، لە هه‌ر 24 چركه‌یه‌كدا كه‌سێك له جیهاندا به‌هۆی ڕووداوه‌كانی هاتوچۆوه گیانله‌ده‌ستده‌دات.
له هه‌رێمى كوردستانیش، به‌پێی ڕاگه‌یه‌ندراوێكى به‌ڕێوه‌به‌رایه‌تیى گشتیى هاتوچۆی هه‌رێمى كوردستان، لەماوەی 10 مانگی ئەمساڵدا سێ هەزار و 509 ڕووداوى هاتوچۆ تۆمارکراون، كه بووه‌ته هۆی گیانلەدەستدانی 476 کەس، هه‌روه‌ها پێنج هەزار و 384 كه‌س برینداربوون.
