وەزیری بەرگریی ئەمریكا: هەر لایەنێك سەربەخۆیی و سەروەریی عێراق پێشێلبكات ڕووبەڕووی دەبینەوە

لوید ئۆستن وەزیری بەرگریی ئەمریكا، هەڕەشەی ڕووبەڕووبوونەوەی ئێران و ئەو گروپانە دەكات كە لێیەوە نزیكن و دەڵێت، “دژی هەر لایەنێك دەوەستینەوە سەربەخۆیی و سەروەریی عێراق پێشێلبكات”.

وەزیری بەرگریی ئەمریكا جەختیكردەوە كە پابەندیی وڵاتەكەی بەرامبەر بە ئاسایشی خۆرهەڵاتی ناوەڕاست بەهێزە و ئاشكرایكرد، ئەمریكا هەوڵی كۆكردنەوەی “تێكەڵەیەكی گونجاوی هێز” دەدات لەپێناو بەرپەرچدانەوەی ئێران و هاوپەیمانەكانی”.

ئەم قسانەی وەزیری بەرگریی ئەمریكا، لەمیانەی وتارێكیدا بوون كە ئەمڕۆ شەممە لە 17یەمین كۆنگرەی گفتوگۆی مەنامە لە بەحرەین پێشكەشیكرد.

كۆنگرەكە تایبەتە بە تاوتوێكردنی ئاڵنگارییە ئەمنییەكانی خۆرهەڵاتی ناوەڕاست و جیهان، لەو بارەیەوە وەزیری بەرگریی ئەمریكا وتی، “بەرگری لە بەرژەوەندییەكانمان لە ناوچەكەدا دەكەین و تێكەڵەیەكی گونجاوی هێز كۆدەكەینەوە بۆ بەرپەرچدانەوەی ئێران، هێزەكانمان لە ئێران و بریكارەكانی دەپارێزین، ئەمریكا هێزی زۆری لە ناوچەكەدا هەیە و ئەگەر پێویست بێت هێزی زیاتریش دەهێنین”.

لوید ئۆستن جەختیكردەوە كە ئەمریكا لەگەڵ هاوبەشەكانیدا كاردەكات بۆ ئەوەی داعش نەگەڕێتەوە بۆ عێراق و سوریا و وتی، “واشنتن پاڵپشتی لە سەربەخۆیی و سەروەریی عێراق دەكات و دژی هەر لایەنێك دەوەستێتەوە كە بیەوێت ئەو دوو بنەمایە پێشێلبكات”.

بابەتی پێشتر

ڕەشپێستەکانی عێراق ئەو توێژەن ڕووبەڕووی زۆرترین جیاوازی دەبنەوە

بابەتی دواتر

ئێران لە كەنداو دەستیگرت بەسەر كەشتییەكی بیانیدا

بابەتی پەیوەندیدار
Total
12
Share