سه‌رۆك وه‌زیرانى عێراق و سه‌رۆك كۆمارى ئێران په‌یوه‌ندییه‌كى ته‌له‌فۆنییان ئه‌نجامدا و گفتوگۆی هێرشه‌كه‌ى سه‌ر ماڵى كازمی و ئەنجامەكانی هه‌ڵبژاردنیان كرد.
به پێی هه‌واڵى میدیا ئێرانییه‌كان، ئیبراهیم ڕه‌ئیسی سه‌رۆك كۆمارى ئێران شه‌وى ڕابردوو په‌یوه‌ندیی به مسته‌فا كازمى سه‌رۆك وه‌زیرانى عێراقه‌وه كردووه و تاوتوێی دۆخى ناوچه‌كه و هێرشه‌كه‌ى چه‌ند ڕۆژى ڕابردووى سه‌ر ماڵى كازمی-یان كردووه.
بەوتەی میدیاكانی ئێران، ڕه‌ئیسی یه‌كگرتوویی و سه‌قامگیریی له عێراق به ستراتیژ ناوبردووه و وتویه‌تى، “نابێت له‌كه‌دار بكرێت”.
هه‌روه‌ها جه‌ختى له‌وه‌شكردووه‌ته‌وه، پشتیوانی له هه‌ر ڕێكارێك ده‌كه‌ن بۆ چاره‌سه‌ركردنی كێشه‌كان به‌شێوه‌ی یاسایی و شه‌فافانه.
له‌باره‌ى دۆخى عێراقه‌وه، ڕه‌ئیسی هۆشداریی ئه‌وه‌ى به كازمى داوه، كه “دوژمنانی گه‌لانی ناوچه‌كه ئاسایش، سه‌قامگیری و پێشكه‌وتنی خه‌ڵكی عێراقیان پێ په‌سه‌ند نییه و له ڕێگای دروستكردنی فیتنه‌وه به‌دوای ئامانجه گڵاوه‌كانی خۆیانه‌وه‌ن، بۆیه هه‌مووان ده‌بێت به‌ئاگا و هۆشیار بن”.
له‌باره‌ى هه‌ڵبژاردنه‌كانی عێراقیشه‌وه سه‌رۆك كۆمارى ئێران وتویه‌تى، ”هه‌ڵبژاردن به ده‌ستكه‌وتێكی گرنگ له چێوه‌ی سه‌روه‌ریی خه‌ڵكی عێراق بۆ دیاریكردنی چاره‌نووسی خۆیان ده‌زانین و پشتگیری له چاره‌سه‌ركردنی هه‌ر جۆره ناڕوونییه‌ك له ڕێگای ڕه‌وته سیاسیه‌كان و به‌شێوه‌ی یاسایی و شه‌فافانه ده‌كه‌ین”.
