یائیر لابید وەزیری دەرەوەی ئیسرائیل لەدیداریدا لەگەڵ ڕۆب مالی نوێنەری ئەمریکا بۆ کاروباری ئێران ئاشکرایکرد، کۆماری ئیسلامیی ئێران نایەوێت بگەڕێتەوە بۆ ڕێککەوتنی ئەتۆمی و یاری دەکات.
بەپێی پێگەی تایمز، بەرپرسە ئیسرائیلییەکە جەختی لە هەڵوێستی وڵاتەکەی سەبارەت بە ئێران کردووەتەوە و ڕایگەیاندووە، ئێران بەئاسانی دەیەوێت کات بکوژێت لەڕێگەی مەرجەکانییەوە بۆ دەستپێکردنەوەی دانوستانەکان، تەنانەت ویستی گەڕانەوەشی بۆ ڕێککەوتنی ئەتۆمیی 2015 ڕاست نییە.
وەزیری دەرەوەی ئیسرائیل بە نوێنەرەکەی ئەمریکای وتووە، ئێران ئامادەکاری ناکات بۆ گەڕانەوەی بەشێوەیەکی جددی بۆ ڕێککەوتنی ئەتۆمی، کە ئەمریکا لە ساڵی 2018ـدا لێی کشایەوە.
بڕیارە ڕۆب مالی هەریەکە لە وەزیری بەرگریی ئیسرائیل و سەرۆکی دەزگای مۆسادی ئیسرائیلیش ببینێت.
ڕۆب مالی ئێستا بە سەردانێک لە ڕۆژهەڵاتی ناوەڕاستە و بڕیارە سەردانی هەریەکە لە سعودیە، ئیمارات و بەحرەین بکات.
