ژمارەی بێكاران لە وڵاتانی عەرەبیدا بەڕێژەیەكی بەرز زیادیكردووە، ئەوانەی بێكارن ژمارەیان 14.3 ملیۆن كەسن و زیاتر ژنان و پیاوانی گەنجن.
ڕاپۆرتێكی هاوبەشی لیژنەی ئیسكوا و ڕێكخراوی كاری نێودەوڵەتی ئەمڕۆ هەینی 20ی ئاب ئاشكرایكرد، هەلی كاری پێویست بۆ دانیشتووانی وڵاتانی عەرەبی دەستەبەر نییە و ڕێژەی بێكاری بەڕادەیەكی زۆر هەڵكشاوە.
ڕاپۆرتە هاوبەشەكەی لیژنەی ئابوری و كۆمەڵایەتیی نەتەوەیەكگرتووەكان بۆ خۆرئاوای ئاسیا “ئیسكوا” و نووسینگەی هەرێمیی وڵاتانی عەرەبی كە سەر بە ڕێكخراوی كاری نێودەوڵەتییە، هۆكاری بێكاری لە وڵاتانی عەرەبیدا گەڕاندووەتەوە بۆ ناسەقامگیریی سیاسی و گۆڕانی دێمۆگرافی و داكشانی سەقامگیریی دارایی و نەختینەیی.
بەگوێرەی ڕاپۆرتەكە، لەمساڵدا ڕێژەی بێكاری لە وڵاتانی عەرەبیدا ئێجگار بەرزبووەتەوە و ژمارەی ئەوانەی هیچ كارێكیان نییە، گەیشتووە بە 14 ملیۆن و 300 هەزار كەس، كە زۆرینەیان پیاوانی گەنج و ژنانن.
ئەو ڕاپۆرتە باس لەوەش دەكات كە نایەكسانی و ناهاوسەنگی لە دابەشبوونی دەرفەتی كاردا هەیە، بەجۆرێك ژنانی وڵاتانی عەرەبی زیاتر بێكارن بەراورد بە پیاوان و كەمتر هەلی كاریان بۆدەڕەخسێت.
