سەعدی پیرە دەڵێت، ئامانجی چوونی شاندی یەكێتی بۆ بەغداد كۆكردنەوەی زانیاری و زانینی بۆچوونی لایەنەكانە، بەپێویستی دەزانێت، بۆ دانوستانە سەرەكییەكانی پێكهێنانی حكومەت، شاندێكی یەكگرتووی كوردستانی بە پرۆژەیەكەوە بچێتە بەغداد.
چەند ڕۆژێكە شاندێكی یەكێتی لە بەغدادە و چەند كۆبوونەوەیەكی لەگەڵ لایەنە سیاسییە عێراقییەكان كردووە، پارتیش بەهەمانشێوە شاندی ناردووەتە بەغداد.
سەعدی پیرە، ئەندامەی مەكتەبی سیاسیی یەكێتی بە تۆڕی میدیایی ئێستای ڕاگەیاند، “لە كۆبوونەوەكانی مەكتەبی سیاسیدا بڕیاردرابوو شاندێك بڕواتە بەغداد، بەڵام بۆ دانوستاندن نەبووە لەسەر پێكهێنانی حكومەت، بەڵكو بۆ كۆكردنەوەی زانیارییە لەسەر پێكهێنانی حكومەت، شاندەكەی پارتیش بەهەمان شێوە بۆ كۆكردنەوەی زانیاریی چوونەتە بەغداد، تاوەكو هەردوو شاندەكە بۆچوونی لایەنەكان وەرگربگرن”.
پیرە ئاماژەی بۆ ئەوەشكرد، “باشترە دوای گەڕانەوەی شاندەكانی یەكێتی و پارتی، ئەو كۆبوونەوە هاوبەشەی كە پێویستە لە نێوان لایەنە كوردییەكان بكرێت بۆ ئامادەكردنی پرۆژەیەك بۆ گفتوگۆكردن لەگەڵ لایەنە عێراقییەكان، هەروەها ئامادەكردنی دەستەیەكی هاوبەش بۆ گفتوگۆ، تا وەكو لە ڕێگای زانیارییەكانی هەردوو شاندەكەوە پرۆژەكە زیاتر دەوڵەمەند بكرێت”.
تا ئێستا لایەنە شیعییەكان لەناوخۆیاندا ناكۆكن لەبارەی ئەنجامەكانی هەڵبژاردن و دروستكردنی گەورەترین و كوتلە و پێكهێنانی حكومەت، ئەندامەكەی مەكتەبی سیاسیی یەكێتی پێیوایە، “ئەگەر لایەنە شیعییەكان نیازیان هەبێت ئەنجامەكانی هەڵبژاردن قبوڵبكەن، ئەوا ڕێكدەكەون، ئەگەریش ڕێكنەكەوتن، ئەوا نایەنەوێت ئەنجامەكانی هەڵبژاردن قبوڵبكەن”.
بۆیە سەعدی پیرە پێیوایە، كورد ئێستا ناتوانێت بۆچوونێك دەربڕێت، بەڵكو لەكاتی خۆیدا هەڵوێستی دەبێت، نەشیشاردەوە كە وەكو عورفێكی سیاسی سەرۆك وەزیران لە پشكی شیعەكانە و “ئەگەر نێوماڵی شیعە ڕێككەوتن لەسەر كاندیدێك، ئێمە ڕێز لە بڕیارەكانی ئەوان دەگرین، هەروەها ئەگەر سوننەكانیش لەسەر كاندیدێك بۆ پۆستی سەرۆكی پەرلەمان ڕێكبكەون، ئەوا ئێمە ڕێزی لێدەگرین”.
دووپاتیشیكردەوە، ” ئێمەی كوردیش بۆخۆمان لەسەر كاندیدێك ڕێكدەكەوین بۆ سەرۆك كۆمار، كە پشكی كوردە”.
