لە گوندی پەڵکانەی سنووری ناحیەی سەرگەڕان لە پارێزگای كەركوك، كە ناوچەیەكی كوردستانیی جێناكۆكە، عەرەبی هاوردە خێمەیان هەڵداوە و بەنیازی مانەوەن، دەڵێن، ”لەسەر زەوی و ماڵی خۆمانین و ناڕۆین”.
پەیامنێری تۆڕی میدیایی ئێستا گواستیەوە، ئەمڕۆ جوتیارە عەرەبە هاوردەكان لەكاتێكدا كە وەرزی كشتوكاڵییە جارێكی دیكە هاتوونەتەوە سنووری گوندی پەڵكانە و خێمەیان هەڵداوە و دەڵێن، “زەویی خۆمانە و لێرە دەمێنینەوە”.
هاوكات شكار مەردان، پارێزەری دۆسیەی زەویی جوتیارانی كورد لە ناوچەكە، بە تۆڕی میدیایی ئێستای ڕاگەیاند، “پرسەكە دەستێكی سیاسیی باڵای لە پشتەوەیە و ڕێگەنادرێت دادگا ڕۆڵی خۆی ببینێت”.
جەختی لەوەشكردەوە، “هەركاتێك دادگا داوا دەكات بە یاساییانە مامەڵە لەگەڵ كەیسەكە بكرێت، بەڕێوەبەرایەتیی كشتوكاڵی كەركوك و ئیدارەی پارێزگاكە دەبنە ڕێگر لەگرتنەبەری ڕێكاری یاسایی لە كێشەكانی نێوان جوتیاراندا”.
