بافڵ جەلال تاڵەبانی لە یادی 237 ساڵەی دامەزراندنی سلێمانیدا سێ بەڵێن دەدات و دەڵێت، “بەڵێندەدەم کە سلێمانی بکەینەوە بەو شارەی کە نەک تەنھا بۆ خەڵکەکەی بەڵکو بۆ ھەموو تاکێکی ئەم نیشتمانە جێی شانازی بێت”.
بافڵ جەلال تاڵەبانی لە پەیامەكەیدا سەرەڕای پیرۆزباییكردن لە دانیشتووانی سلێمانی، دەڵێت، “بەڵێندەدەم کە سلێمانی بکەینەوە بەو شارەی کە نەک تەنھا بۆ خەڵکەکەی، بەڵکو بۆ ھەموو تاکێکی ئەم نیشتمانە جێی شانازی بێت، شارێک بێت بە باڵای ناسناوەکەی، کە (پایتەختی ڕۆشنبیری، ھەڵمەت و قوربانییە) خزمەتبکرێت”.
هەروەها بەڵێنی ئەوەش دەدات، “بە ھەموو ھێزێکمەوە تێبکۆشم بۆ کۆتاییھێنان بە پەراوێزخراوی و کەموکوڕییەکانی ئەم شارە و گۆڕانکاریی ڕیشەیی لە کەرتی خزمەتگوزاری و سەرجەم لایەنەکانی دیکە بکەمە پێشینەی کارەکانم”.
سێیەم بەڵێنی بافڵ جەلال تاڵەبانی بۆ سلێمانی ئەوەیە كە وەك خۆی دەڵێت، “دەبینە پارێزەری ڕاستەقینەی سلێمانی، شارە حەیاتەکەی مام و پاراستنی گیان و ئاسایشی تاک بەتاکی ئەرکی سەرشانمان دەبێت”.
