ژمارەیەك ئەندامی پەرلەمانی کوردستان لە یاداشتێکدا داوای ئەنجامدانی دانیشتنێکی پەرلەمان دەکەن بۆ گفتوگۆکردن لەبارەی گەڕاندنەوەی دەرماڵەی خوێندکارانی زانکۆ و پەیمانگاکان.
لە یاداشتێكدا كە ئاراستەی پەرلەمانی كوردستانیان كردووە، 48 ئەندامی پەرلەمانی كوردستان داوادەكەن دانیشتنێکی پەرلەمان ئەنجامبدرێت بۆ گفتوگۆکردن لەبارەی گەڕاندنەوەی دەرماڵەی خوێندکارانی زانکۆ و پەیمانگاکان.
ئەو پەرلەمانتارانە لە یاداشتەكەیاندا باسیان لەوەكردووە “بەپێی ماددەی 66 خاڵی یەکەم لە پەیڕەوی ناوخۆی پەرلەمانی کوردستان، ئێمەی ژمارەی یاسایی ئەندامانی پەرلەمان، داوا لە بەڕێزتان دەکەین، بابەتی (گەڕاندنەوەی دەرماڵەی خوێندکارانی زانکۆ و پەیمانگاکان) لە نزیکترین دانیشتندا، بخەنە بەرنامەی کاری پەرلەمانەوە”.
هەروەها داوایانكردووە وەزیرە تایبەتمەندەکان بانگهێشتبکرێن بۆ ئامادەبوون لە دانیشتنەکەدا.
ئەوەش دوای ئەوە دێت لە ساڵی خوێندنی 2015-2016ەوە لەلایەن وەزارەتی داراییەوە دەرماڵەی خوێندکارانی زانکۆ و پەیمانگاکان بڕدراوە.
