میدیاکانی لیبیا ئاشکرایانکرد، ئەمڕۆ یەکشەممە، سەیفولئیسلام کوڕی موعەمەر قەزافی سەرۆکی پێشووتری لیبیا خۆی بۆ سەرۆکایەتیی وڵاتەکە کاندیدکردووە.
بڕیارە ڕۆژی 24ی مانگی داهاتوو هەڵبژاردنی سەرۆکایەتی لە لیبیا بەڕێوەبچێت و دوای چەندین ساڵ شەڕ و ناکۆکی خەڵکی لیبیا سەرۆکی وڵاتەکەیان هەڵدەبژێرن.
ئەوەی جێگای سەرنجی میدیا جیهانییەکان بوو سەیفولئیسلام بە جلی کەلتووری و نزیک لە جلەکانی قەزافی باوکەوە دەرکەوت و ناوی خۆی لە کۆمسیۆنی هەڵبژاردنەکان تۆمارکرد.
بەهۆی شەڕی بەردەوام و ناکۆکیی گروپە چەکدارەکانی لیبیاوە، ئەگەری هەیە وەک ئەنجامی زۆرینەی وڵاتانی “بەهاری عەرەبی” خەڵکی لیبیا نائومێدبن لە لابردنی موعەمەر قەزافی و جارێکی دیکە دەنگ بدەنەوە بە کوڕەکەی قەزافی بۆ گەڕانەوەی لیبیا بۆ پێش ساڵی 2010.
بەپێی ئەو هاوکێشەیە، جگە لەوانەی نائومێدبوون لە ئەنجامی شۆڕش و لابردنی قەزافی، هێشتاش بنەماڵەی موعەمەر قەزافی لەناو لیبیادا هەژموونیان هەیە و لەگەڵ حوکمی بنەماڵەی قەزافیدان.
کاندیدبوونی کوڕێکی موعەمەر قەزافی لیبیا دەباتەوە بۆ هاوکێشەیەکی نوێ لە وڵاتەکە، دوای ئەوەی لایەنەکانی شەڕ نەیانتوانی لیبیا بخەنەوەسەر سکەی هاوکێشە ئابورییەکانی جاران.
