پێکانی یاریزانانی یانەی بەرشلۆنە گەیشتووەتە ئاستێکی مەترسیدار، لەئێستادا 10 یاریزانی ئەو یانەیە تووشی پێکان بوون و لەسەر تەختی چارەسەرکردن چارەسەریان پێدەدرێت.
بەپێی زانیارییەکانی ڕۆژنامەی سپۆرتی کەتەلۆنی، چاڤی هێرناندێز لە دەستپێکی کارەکەیدا هەوڵدەدات کێشەی پێکانەکان چارەسەربکات، بۆ ئەم مەبەستەش توێژینەوەی لەبارەی یاریزانان و ستافی پزیشکیی یانە کەتەلۆنییەکەی کردووە.
چاڤی پێیوایە ستافی پزیشکیی بارسا پێویستی بە شارەزایەکی تایبەتی بواری پێکانەکانە، بۆ ئەو مەبەستەش داوای گەڕادنەوەی دکتۆر پرونا-ی کردووە، کە لە پۆستی ڕاوێژکاریی پزیشکیدا بووە تاوەکو 2020، لە مانگی شوباتی 2021 و دوای 25 ساڵ کارکردن لە بارسا ڕوویکردووەتە یانەی شارقە لە ئیمارات.
دکتۆر پرونا لەپێشوودا کاری لەگەڵ چەندین ئەفسانەی یانەکە کردووە، بە مێسی و چاڤی و ئینێستاشەوە، ماستەری لە زانکۆی بەرشلۆنە سەبارەت بە پێکانی ماسولکەیی و بەستەرەکان بەدەستهێناوە، هەروەها هەڵگری بڕوانامەی دکتۆرایە لە زانستی بۆماوەیی و پێکانە وەرزشییەکان.
