“فراكسیۆنی میلـلیی سەربەخۆ” ناوی ئەو فراكسیۆنەیە كە ئەمڕۆ چوارشەممە ژمارەیەك كاندیدی سەربەخۆی براوەی هەڵبژاردنە پەرلەمانییەكەی عێراق پێكیانهێنا.
فراكسیۆنەكە ڕاگەیەندراوێكی بڵاوكردەوە و دەڵێت، “ڕێككەوتن لەنێوان ژمارەیەك كاندیدی سەربەخۆی براوەدا كراوە بۆ پێكهێنانی فراكسیۆنی میلـلیی سەربەخۆ، كە فراكسیۆنێكی پەرلەمانیی كراوەیە بەڕووی كاندیدە براوەكانی تردا بەبێ لەبەرچاوگرتنی نەتەوە و ئایین و مەزهەبیان، مەرجی بەشداریكردن لەم فراكسیۆنەدا لەبەرچاوگرتنی بەشدارییەكی تەواوە لە بڕیارە سیاسییەكانیدا”.
فراكسیۆنەكەی بەشێك لە كاندیدە سەربەخۆكان، محەمەد عنوزی وەك ڕێكخەر دەستنیشانكردووە و سەجاد سالم بووەتە وتەبێژی فەرمیی فراكسیۆنەكە.
“فراكسیۆنی میلـلیی سەربەخۆ” لە ڕاگەیەندراوەكەیدا ئاماژە بۆ ئەوە دەكات كە شێوازی پشكپشكێنە ڕەتدەكاتەوە و چاودێرێكی كارای حكومەت دەبێت و بەگژ گەندەڵیدا دەچێتەوە و بەرگری لە مافی هاوڵاتییان و سامانە نیشتمانییەكان دەكات.
