وەزارەتی دادی سوریا ڕایگەیاند، 24 کەس کە وەک تۆمەتباری سەرەکی ئاگرخستنەوە لە ساڵی ڕابردوودا دیاریکراون، لە سێدارە دراون.
بە پێی ڕاگەیەندراوێکی وەزارەتی دادی سوری، لەگەڵ لە سێدارەدانی ئەو 24 کەسەدا 11 کەسی دیکە بە زیندانی هەتاهەتای و چەند کەسێکی خوار 20 ساڵ سزادراون.
لە مانگی 9 و 10ی ساڵی ڕابردوودا ئاگر لە ناوچە کوێستانەکانی کەناراوەکانی سوریا دەکەوتەوە و بەهۆیەوە سێ کەس سوتان و گیانیان لە دەستدا.
ڕێکخراوەکانی مافی مرۆڤ ئەوە ئاشكرا دەکەن لە ساڵی 2011وە تا ئێستا هەزاران سوری لەلایەن حکومەتی سوریاوە لەسێدارەدراون.
لەگەڵ هۆکاری مرۆیی بۆ ئاگرەکەی ساڵی ڕابردوو، وشکەساڵی و بوونی پوش لە ناوچە شاخاوییەکان هۆکاری ئاگرە گەورەکە بوون.
وەزارەتی دادی سوری ئاشکرایکردووە، ساڵی ڕابردوو 187 ئاگر لە پارێزگاکانی (لازیقیە و تەرتوس و حومس و حەما) و چەند شوێنێکی دیکە کەوتوونەتەوە، لەگەڵ ئەوەش نزیکەی 13 هەزار هێکتار زەوی کشتوکاڵی و 11 هەزار هێکتار دارستان سوتاون.
